„Putra Anak Agung, kaponakan Sukawati ...,” ceuk nu anyar tumpak.
Ngadak-ngadak ceuli-lentaheun. Kuring pasang kuping, hayang nandean ceceretan caritana. Hese kadengena, da nu ngobrol henteu cowong. Katurug-turug kasawur ku guruh sora motor kolot, Chevrolet maju ka gobreg.
„Doktorna bae nu kitu mah, benerna nu kolot beresan heula!”
Les deui teu katuturkeun tuluyna nu nyarita teh, Nya kitu deui pertanyaan nu dibawa nyaritana, teu kadenge, ukur hawar-hawar jawabna bae.
„Anu matak nyusul, ngajorag, da nyahoeun meureun di dieu rek ngadon kawin.”
Keur meujeuhna ceuli-lentaheun, atoh otobeus eureun teh. Ceuk ingetan, tangtu bisa laluasa ngadengekeun. Tapi ari reg otobeus eureun mah, nu ngawangkong oge milu eureun. Sakedapan malah jempe taya nu lemek sakemek.
Hawa karasana nyongkabna ari otobeus eureun mah, ngelekeb asa poe kasedek. Nu tarumpak geus leuwih loba nu limpeu ti batan nu masih cenghar. Tinglalenggak tinglalenggut. Aya nu merelek bae heuay. Aya nu nyegrek sare oge, ngalehleh kana panyarandean. Ngan nu anyar tumpak nu ajeg keneh diukna teh. Da nu rea mah elekesekeng, bangun kitu teu ngeunah, kieu teu merenah. Ulat nu tarumpak rata-ratana gambar nu aral. Teu sabar, bangun pada hayang buru-buru cunduk ka nu dijugjug. Tapi supir jeung kanektur mah bangun teu malire. Jarongjon bae ngobrol jeung tukang warung. Supir mah bari capek-rahem teh otel jeung mojang nu mantu-mantu laladen, wanda awewe sonagar.
„Eta, geus-geus karuhan kitu bet dijurungkeun bae, nya?” nu saurang ngamimitian deui lalaunan.
„Nu matak oge,” tembal baturna. „Ceuk urang mah asa kurang wiwaha, Abong kena dibawa ku nu wajibna. Lain kudu goreng sangka, atuh sapantesna bae ari timburu mah. Komo ieu kolot geus bukti sakitu ngangkrakna."
„Atuh puguh,” ... walon nu saurang deui bari unggeuk, sari-sari anu milu mangmelangkeun.
Di Tabanan nu saurang turun.
