ěngke di ahir. Moal, moal, beu, teu aja pangintěn teuing kana kikitoean,” saoer djoeragan Rachmat.
Da geus taja ladjoena, oetoesan amitan, toeloej maroelang. Sadjadjalan ngaroepat, moedji ka djoeragan Rachmat. „Moen oerang nja, boga piminantoeeun tjara eta, beu ambeu, meureun dipoesti-poesti, dibeuli-beuli, soepaja njaaheun ka anak oerang,” tjek noe pangtkolotna. Tjek noe saoerang: „Jaktos, ieu mah kalah ditoker. Djělěma kamanigan, pipilih njiar noe leuwih, kotjeplak meunang noe petjak, geura ěngke.” Ditembal deui koe noe kolot: „Poko-pokona noe ngaběroeng teh, ieu indoeng awewe, sarerea kabaoed.”
„Jaktos kitoe tea mah, nanging eta djadi lalaki teh Teukoe Djenal mah keujeup apoe, dikokop koe awewe teh. Koemaha disěntak sakali oge, peot. Moen simkoering dikitoe koe awewe, jih ......... oeninga aja bedjana waeh,” tjek noe saoerang deui.
Gantjangna geus něpi ka Meureudoeati oetoesan teh, tjat aroenggah ka boemina Teukoe Djenal. Kakara gek pisan oetoesan, geus pok iboe Ěnden mariksa: „Koemaha beres?”
„Tjarios mah beres, ngan ieu barang sarěng artos kabantoen deui, da teu ditampi, kop bae mere keur Saniah, basana.”
Ana tjeuleuweung teh iboe Ěnden: „Ambeuing-ambeuing, tjoetjoengah teuing, rarasaanana teh djadi naon, ngahina teuing, ngahampas teuing. Teu dibere koe noe kitoe patoet oge, anak aing teh moal boeroeng bisa make noe kitoe. Ěmang deui dikolotkeun teh tjara boedak, make kěrěsa njandak deui, moen aloengkeun wae kana beungeutna.”
Tatjan kěbat morobotna, kaboeroe tjarogena njěntak, geus teu katahan tajohna, sieun geureuhana těroes ngatjambleng, saoerna: „Djoebaedah! sing ingět, ngomong teh oelah djangdji heuaj!”
„Ngewa kami mah, keun soegan dakwa ka Toean Běsar.”
Isoekna rama Siti Saniah disarěngan koe oetoesan noe tiloean tea, ngadeuheus ka oeleěbalang (rěgen), ngoendjoekkeun kitoe2 pěrkarana, njoehoenkeun pitandangna moelangkeun panjangtjangna ka djoeragan Rachmat. Boeboehan rěgen noe djadi menak, pěrkarana dioeroeskeun. Moelih ti paseban djoeragan Rachmat rěmběs tjisotjana.
Soemping ka boemi, sasaoeran doemareuda ka djoeragan Soelaeman, jen pěrkarana parantos dipoetoes di paseban. Boes ka kamar, toeloej njěrat.