koe pĕrbawa ratoe,
sabar adil palamarta,
pintĕr bantĕr pinandita wanda rĕsi,
tina gĕntoer tapana.
(Ekalaja Palastra anggitan M. A. Salmoen, Bale Poestaka 1938).
II.
Dangdanggoela
Poentjak goenoeng kabeh katingali,
ngalingkoengan padataran rata,
ngemploh hedjo kĕbon karet,
tĕmpat lindoek toer ioeh,
boet-bat djalan matak sarĕdih,
ti sisi liberia,
kĕmbangan keur oesoem,
soemĕbar angin-anginan,
haroem kĕmbang katĕbak koe angin lirih,
estoe matak baloeas.
Di bawahan Poerwakarta nagri,
tanah kontrak wastana Tjikoempaj,
kagoengan Kangdjĕng Goepermen,
padamĕlna kasĕboet,
opsendĕrna bangsa priboemi,
estoe tĕrah Priangan,
asal ti Tjiandjoer,
harita katatamoean,
hidji istri anoe keur lalandong galih,
kapipoetra garwana.
(Wawatjan roesiah noe kasep, karangan Njai Raden H. Hadidjah Tjiandjoer 1922)
