Kaca:Puisi Sawer Bahasa Sunda.djvu/270

25. Ngaran istri nu sajati
    anu taat ka salaki
    saban beurang peuting bakti
    sanajan nepi ka pati

26. Dina jalan anu bener
    sanes jalan kabalinger
    istri diwajibkeun taat
    ka caroge kedah hidmat

27. Mun caroge nuju angkat
    urang masing sabar kiat
    mempertahankeun amanat
    kade urang ulah lepat

28. Sing yasa ngajaga diri
    kumaha istri sajati
    wanita anu hakiki
    nu sujud ka Maha Suci

29. Sabab dawuhan yang Manon
    mun istri sok unclang-anclong
    ka caroge sering bohong
    pasti ku Allah dibendon

30. Mun caroge ngawurukan
    regepkeun ulah bengbatan
    sumawonna mun nundutan
    atanapi molototan

31. Najan geulis tur perceka
    tapi lamun lalawora
    ka caroge teu ngawula
    pasti haram ka sawarga

32. Istri teh ulah pacuan
    ngicip-ngicip jeung ngasaan
    ngalampahkeun kacurangan
    nu dilarang ku Pangeran

33. Mun caroge mulih nyaba
    papag ku budi jeung basa
    hingga caroge ngarasa
    nyaahna teu asa-asa

34. Agus kasep putra ibu
    eobi ku Agus didangu
    mun kasep ngagugu tangtu
    bakal pinanggih rahayu

35. Kapungkur urang nyorangan
    henteu aya nu nyarengan
    ngan badan urang sorangan
    nu jadi poko pikiran

36. Nanging ayeuna mali Ujang
    dinten ieu kenging beban
    beban Ujang ti Pangeran
    uruseun di ieu alam

37. Rasa salin ti sasari
    jeung keur bubujangan tadi
    lengkahna ge beda deui
    kasusahna tambah deui

38. Agus sabage pamingpin
    tanggung jawab lahir batin
    bagjana jeung cilakana.
    urang pisan nu nyanggana

39. Garwa teh ulah diabur
    ubrang-abring reujeung batur
    lamun henteu bisa ngatur
    ahirna timbul ngalantur

40. Istri lir manuk japati
    diabur ka mana-mendi
    teu caek cicing di bumi
    lami-lami palay ganti

261