Kaca:Puisi Sawer Bahasa Sunda.djvu/271

41. Da bonga urang sorangan
    sok kajeunan jeung antepan
    osok rasa maneh nyaah
    diantep turun ti imah

42. Ujang teh imam kahiji
    di rumah tangga pribadi
    lamun teu yasa ngariksa
    engke ku Ujang karasa

43. Sakitu ibu pepeling
    saeutik tatapi penting
    candakeun Ujang jeung Nyai
    mangkade aranjeun lali

44. Mudah-mudahan Pangeran
    ka aranjeun mikaheman
    dina enggoning rarabi
    diaping ku Maha Suci.

No.	:	8
Penggubah	:	ibu Encep,(P)
Pekerjaan	:	Kepala SD
Tempat	:	Tasikmalaya

Kinanti

1. Paralun nyelang pihatur
   ka sadayana nu caralik
   ieu abdi nyawer heula
   nguesian tali paranti
   nyumponan kabiasaan
   nurut galib nini aki

2. Diatur diwangun catur
   dirakit dangding pepeling
   direka babaran basa
   ngedalkeun hariring ati
   gelarna rasa kanyaah
   ka nu anyar jatukrami

3. Malar tinemu rahayu
   pinanggih repeh jeung rapih
   enggoning rangkep rimbitan
   layeut geugeut silih asih
   sing tibra sugema rasa
   ngeunah nyandang ngeunah nyanding

4. Piwuruk barengdiragum
   ka pameget ka nu istri
   dirapidkeun duanana
   moal rek diwiji-wiji
   supaya singget waktuna
   ulah matak kesej calik

5. istri wajib sujud tuhu
   tuhu satia babakti
   nyumponan dikaistrian
   rikrik gemi ati-ati
   miara parejekian
   teu nyesa ge asal mahi

6. Ulah salimur salingkuh
   matak cambal ajen diri
   serong mirong jeung karinah
   nu kitu kudu dipahing
   doraka dunya aherat
   moal pinanggih walagri

262