Kaca:Puisi Sawer Bahasa Sunda.djvu/274

15. Saparantosna sawawa
    dugi ka rumaja putra
    bet pareng aya jodona
    teu terang ti mana jolna

16. Takdir ti nu Maha Suci
    bet norojol bae pasti
    najan dihalang ku gunung
    kadar dongkap ti Yang Agung

17. Urang wajib trimakasih
    ka Alloh nu Welas Asih
    laku lampah kedah bersih
    ku Alloh sing isin ajrih

18. He geulis panganten istri
    regepkeun masing taliti
    Eulis teh nepi ka pasti
    kenging ralimat ti Yang Widi

19. Anaking geulis sing eling
    sing emut kana pepeling
    istri ku Nabi digeuing
    pikeun hakna masing-masing

20. Laku lampah sing saluyu
    candak jalan nu rahayu
    istri nu soleh pinasti
    dipangga-ponggo ku Gusti

21. Istri ibarat permata
    disebatkeun na hadisna
    numawi kedah iatna
    sing leres mernahkeunana

22. Ngaran istri nu sajati
    nu taat ka salaki
    saban beurang peuting bakti
    sanajan tepi ka pati

23. Dina jalan anu bener
    sanes jalan kabalinger
    istri diwajibkeun taat
    ka caroge kedah hidmat

24. Mun caroge nuju angkat
    urang sing sabar kiat
    mempertahankeun amanat
    kade urang ulah lepat

25. Sing yasa ngajaga diri
    kumaha istri sajati
    wanita anu hakiki
    nu sumujud ka salaki

26. Sabab dawuhan Yang Manon
    mun istri sok unclang-anclong
    ka caroge sering bohong
    pasti ku Alloh dibendon

27. Mun caroge ngawurukan
    regepkeun ulah bengbatan
    sumawonna mun nundutan
    atanapi molototan

28. Najan geulis tur perceka
    tapi lamun lalawora
    ka caroge teu ngawula
    pasti haram ka sawarga

29. Istri teh ulah pacuan
    ngicip-ngicip jeung ngasaan
    ngalampahkeun kacurangan
    nu dilarang ku Pangeran

30. Mun caroge mulih nyaba
    papagku budi jeung basa
    hingga caroge ngarasa
    nyaahna teu asa-asa

265