No: 11
Penggubah: Maemunah;(P)
Umur : 47 tahun
Pekerjaan : Guru SD dan juru sawer
Tempat: Cirebon
Kidung nu jadi kawitan
minangka pamuka jalan
jalan keur nganasehatan
ka nu mentas dirapalan
Dangukeun ku sadayana
ku panganten duanana
sugan jadi mangpaatna
aya pulunganeunana
Awit panganten istrina
Eulis cunduk ka waktuna
ninggang mangsa nu utama
teu aya wagelanana
Danget ieu didahupkeun
kulawargi dikempelkeun
anu tebih dicaketkeun
maksadna kangge nyaksikeun
Eulis tos gaduh panutan
masing layeut sabeungkeutan
lamun rek indit-inditan
ulah tinggal ti pamitan
Upama rek nyanyabaan
caroge teu ngawidian
ulah maksa miheulaan
sok matak papaseaan
Lamun istri luas-leos
indit henteu paramios
ngaranna teu sapagodos
caroge meureun teu raos
Mun keur mendak kakirangan
omat ulah ngaderingan
ka caroge sok mundungan
eta teh lampah larangan
Najan dahar karo seupan
ka caroge tetep sopan
da eta nu ngempan-ngempan
.nu mangmikirkeun tilepan
Mun pareng ageung rijkina
sing bisa ngeureut miceunna
istri anu ngabagina
kedah emut ka ahirna
Mun istri teu ngajeujeuhkeun
pangala sok diseepkeun
teu aya nu disesakeun
ngaranna tamplok batokeun
Pan istri teh padaringan
tong mawa karep sorangan
kedahna sabilulungan
ambeh dipakaya dangan
Kudu ngaku ka baraya
ti ibu sareng ti rama
kitu deui ti mertua
ulah rek dibeda-beda
Ka batur kudu someah
tata basa anu ngeunah
mbeh loba nu mikayaah
hirup kumbuh tumaninah
