Kaca:Puisi Sawer Bahasa Sunda.djvu/282

31.  Anjeun tos kagungan istri
    titis tulis Maha Suci
    putra ngadahup ka putri
    sing pageuh kawas dipatri
    
    

32. Ka istri kudu ngaheman
    mangkade aya jeruman
    eta teh goda siluman
    anjeun kedah tetep iman
    
    

33. Ulah bosen mapatahan
    tapi basana milihan
    ulah mere kasedihan
    ka istri bilih nyalahan
    
    

34. Sing landung aisanana
    sarta lega sagarana
    kudu gede hampurana
    supaya awet jodona
    
    

35. Upama rek nganasehat
    carita anu pasehat
    pilih ulah kecap jahat
    matak teu jadi masalahat
    
    

36. Jeung istri silih hormatan
    silih ma'lum kalepatan
    sangkan tebih pipirakan
    malah raket kawas ketan
    
    

37. Adat ulah rek kumaki
    tong kena jadi lalaki
    rasa anjeun jadi joki
    emut bakal aki-aki
    
    

38. Mun umur tepi ka sepuh
    anjeun pasti panggih ripuh
    lumaku jadi teu mampuh
    cing saha nu baris nempuh
    
    

39. Mun ku urang ditelekan
    nu nempuh teh pamajikan
    sanajan sok ngadelekan
    tapi tetep ngabelaan
    
    

40. Da meureun dina pikirna
    ngemutkeun purwadaksina
    emut keur pada anomna
    tangtos sami ngaraosna
    
    

41. Mangkade ulah ngalantur
    ekol jeung bohong diatur
    ka bojo mah tutur-tutur
    tas rapat jeung pada batur
    
    

42. Adat kitu mo jamuga
    pakaya teu kaur boga
    matak isin ku tatangga
    kaduhung mah pasti jaga
    
    

43. Lamun istri kalepatan
    ulah gugup ngabenduan
    anggur geura dideukeutan
    barabat dinasehatan
    
    

44. Istri teh didama-dama
    diwuruk anu utama
    ulah ingkar ti agama
    Islam nu langkung utama
    
    

45. Dina waktos bade sare
    maos bismillah salawe
    mbeh kenging turunan sae
    kenging putra hade hate
    
    

46. Lamun tos gaduh turunan
    anjeun jadi pupuhunan
    putra putu ngarajenan
    perjodoan tambah aman

273