Kaca:Puisi Sawer Bahasa Sunda.djvu/283

47. Putra cekap tilu bae
    seueur teuing mah barabe
    kanggo nolak nu teu sae
    mangga geura lebet kabe
    
    

48. Margi eta parantos sah
    pangaturan pamarentah
    urang henteu kedah sesah
    tos aya jalan nu genah
    
    

49. Hirup teh kedah iatna
    laku lampah nu sampurna
    sangkan sugema hirupna
    sareng tebih balaina
    
    

50. Jeung batur silih geuingkeun
    ulah sok silih gorengkeun
    atawa sok ngistorikeun
    sumawonna nyilakakeun
    
    

51. Jeung bangsa kudu ngahiji
    pikiran kudu diaji
    ulah lirca kana jangji
    lempeng siga angka hiji
    
    

52. Sanajan misah golongan
    uang hirup sasarengan
    ulah nyongcolang sorangan
    siga nu aing-aingan
    
    

53. Lamun urang kumawula
    pacuan ulah bahula
    bosenan jeung ngarasula
    matak teu kapake lila
    
    

54. Saniskanten perjalanan
    laku lampah jeung omongan
    osok aya nu nitenan
    masarakat ngabandungan
    
    

55. Lamun hirup lampah serong
    pasti diri teh dirongrong
    masarakat pada merong
    geus badan teh jadi perong
    
    

56. Anu awon kalakuan
    najan rasa bubunian
    laun-laun kanyahoan
    da Allah teu ngawidian
    
    

57. Manawi sing ati-ati
    sing luhur budi pekerti
    tindak-tanduk tata-titi
    jalankeun anu tarapti
    
    

58. Komo ayeuna merdeka
    ulah rek angkara murka
    sirik musrik jeung deleka
    ahirna matak cilaka
    
    

59. Namung sakitu piwulang
    mangga ku aranjeun selang
    mun kenging mah ulah hilang
    lumayan baris pangilang
    
    

60. Nunuhun ka nu Kawasa
    maparinan rahmat rasa
    diri urang teh diraksa
    tebihkeun nu baris nyiksa
    
    Amin ya robal alamin
    mugi Gusti nangtayungan

274