Kaca:Puisi Sawer Bahasa Sunda.djvu/298

52. Amal hade tangtu genah
    laki rabi tumaninah
    lamun amal anu salah
    jaga baris nyorang susah
    

53. Susah lamun teu ngarobah
    nu ngajak ngarah ngarinah
    napsu nu mawa sarakah
    pek atuh pake ibadah
    

54. Mun ibadah anu tangtu
    bagikeun ka nu pihatu
    mikeunna tong ragu-ragu
    bilih istri janten bendu
    

55. Bendu istri Asep bingung
    ulah waka sok ditundung
    lamun istri terus pundung
    pangmeserkeun geulang kalung
    

56. Geulang kalung serba sae
    enggal atuh geura pake
    dianggena unggal poe
    nu kantun pelesir bae
    

57. Pelesir Eulis ka Kota
    tah bawa duit sajuta
    mun aya kahayang menta
    tapi ulah lahuta
    

58. Lahuta aya kahayang
    nyariosna ngagorolang
    nu bakal moal kasorang
    pikir nu mawa bingbang
    

59. Bingbang bongan sok sulaya
    mikahayang nu teu aya
    ahirna pakia-kia
    ngajauhan ka baraya
    

60. Baraya lamun ngahiji
    eta nu langkung utami
    hubungan anu sajati
    ngariung sapara wargi
    

61. Wargi Asep sadayana
    sakitu mikadeudeuhna
    barungah dina manahna
    nu janten ibu ramana
    

62. Ibu rama ngiring doa
    Asep ngagaduhan garwa
    istrina lamun satia
    hiji bae tong ngadua
    

63. Ngadua gaduh istrina
    moal beres salamina
    pakucrut rumah tanggana
    mun teu cocog jeung agama
    

64. Era atuh ku tatangga
    sapopoe ngan pasea
    ku istri dipingewa
    ku tatangga dilelewa
    

65. Lamun boga harta banda
    sing kuat nahan gogoda
    bisi kagoda ku randa
    pikir heula jero dada
    

66. Pikir Asep sing waspada
    supaya teu ngarasula
    mun keukeuh pikir midua
    akibat jadi pasea
    

67. Pasea jeung pamajikan
    napsu setan barangasan
    teu ngajadi kauntungan
    tetep dina krugian

289