Kaca:Puisi Sawer Bahasa Sunda.djvu/300

84. Lalajobari pelesir.
    tingali sisi basisir
    sugan awas tina pasir
    alam dunya geura taksir
    
    

85. Geura taksir pangaturan
    dadamelanana Pangeran
    aya gedong matak heran
    luhur pageuh nanakeran
    
    

86. Teu ngaruag teu ngarieg
    sakitu eusina uyek
    pirang-pirang nu ngalenyek
    tapi henteu ngarempeyek
    
    

87. Ya Allah anu ngayuga
    ieu alam ngan nyalira
    buni langit ge lohaga
    eusina mani tohaga
    
    

88. Eusi dunya warna-warni
    cahaya panonpoena
    sato tatangkalanana
    cawisan keur manusana
    
    

89. Manusana maruji sukur
    ka Gusti Allah nu ngatur
    panganten sing subur mamur
    kalayan hirupna jujur
    
    

90. Masing jujur sahaluan
    ayeuna Asep duaan
    ulah aya pacengkadan
    sing bisa silih belaan
    
    

91. Bela pati jiwa raga
    dunya katut aheratna
    ku Asep kudu dijaga
    sangkan Eulis gumbirana
    
    

92. Gumbira nu pangantenan
    papatah tamba lumayan
    ku Eulis Asep lenyepan
    nyawerna tereh wekasan
    
    

93. Nyawer teh turun tumurun
    tuturunan ti karuhun
    pamugi ulah dikantun
    sawer turun hatur nuhun
    
    

94. Sawer hartina panggeuing
    papatah geura nyararing
    dangding bari ngahariring
    pepėling masing areling
    
    

95. Areling urang sadaya
    ka Gusti Allah nu mulya
    ulah aya panca baya
    sadaya mugi waluya
    
    

96. Waluya para wargina
    rawuh para pangantenna
    gumuruh rasa batinna
    sareng hate ka Gustina
    
    

97. Gusti abdi muji nuhun
    ngumbara mangtaun-taun
    ku bumi alam dilahun
    nimat kateda kasuhun
    
    

98. Duh Gusti langkung heman
    mugi sadaya sing iman
    nya netepan kaislaman
    mugi maot mawa iman
    
    

99. Bapa nyawer teh parantos
    mung kantun bade wawartos
    ka ondangan nu ngarantos
    mugi sami pada ngartos

291