Dion, "Mangga Jang, cing kuring paparin roko lima siki mah"; tuluy Ujang ngodok tina sakuna bari tuluy dibikeun.
Isukna jol deui si Kampeng nenjokeun ngaput.
Ceuk Dion, "Peng, cing euy dewek menta bako". Kampeng geuwat nyiwit tina dompetna, kira tilu rokoeun bari tuluy diasorkeun.
Ceuk Dion, "Abong beberean teh cara nu ngopet bae".
Kampeng, "Teu aya deui, tuh kuring oge ngan saeutik".
Harita keneh jol deui Pepe rek nyokot bajuna, kakara gek diuk, Dion geus menta pipah nu keur dipake, pokna, "Pepe cing ajang kuring bae eta pipah teh".
Pepe, "Kumaha da teu boga deui".
Dion, "Atuh surutuna bae hiji mah".
Pepe, "Euweuh surutu oge beak".
Dion, "Eta bae kuntungna ku kuring beakkeun".
Pepe eraeun tluy dibikeun.
Ari balik si Kampeng ngomong ka Pepe pokna, "Pe, naha ari adat Dion kitu, eta teh ka unggal-unggal semah kituna?"
Pepe, "Atuh puguh bae, dewek mah teu kaget da jelema elmu tumbila".
22. GALAGAH KACAAHAN
Hartina : nganteur napsu kabawa ku batur nu matak ilaka, saperti: nu daek diajak maling, diajak nipu, diajak tunggal-teunggeul (diajak ngarah).
Kijan diajak ku si Guna ngahurup si Unan, pokna, "Kijan hayu urang ngahurup si Unan, tah silaing mawa gegendir, dewek mawa kalak".
Ti dinya bral arindit, barang gok terus bae si Kijan neunggeul, dipindo ku si Guna, Unan ngajungkel kapaehan.
