si Paen bae da tukang heureuy, jeung pada nuduh, sarta pada semu ngarewa ka Paen, ari ka Irsadi mah teu aya nu nyangka saurang-urang acan,
Barang dihantem dipulisi, sidik eta rante emas geus dipaling ku Irsadi sarta geus dijual ka kamasan, tuluy Irsadi dilepas ti sakolana sarta diserenkeun ka pulisi.
Ceuk Guruna, "He barudak! satadina aing jeung maraneh oge, nyangka ka si Paen, henteu nyangka ka Irsadi saeutik-eutik acan, da jiga budak bageur, temen, wekel kana pangajaran, tah barudak nu sarupa kitu nu disebut "Giri lungsi tanpaingan teh,atawa leuwi jero beunang diteuleuman, ari hate jelema mah, deet henteu ka kopet".
Murid, "Sumuhun! sumuhun!"
45. MOBOK MANGGIH GOROWONG
Hartina : nu keur ngakal-ngakal kana hahadean aya nu nulung.
Rd. Raksa geus heubeul jadina jurutulis Camat di hiji onder-distrik , unggal-unggal ngadeuheus ka dununganana sok unjukan, pokna, "Manawi aya idin jisim kuring bade rekes bae, hayang jadi Jurutulis Wadana."
Ari saur juraganana, "Wah ki Jurutulis montong rekes, anggur urang nunggu kumaha kersana nu Agung bae, bari ti bareto dicarek teh bet keukeuh bae ceuk dewek montong, montong".
Rd. Raksa bingungeun pisan; ari rek maksa rekes henteu unjukan heula teu wani, da bisi kumaha onam, tina Rd. Raksa jelema bageur, tara maksa lamun teu aya idin dunungan.
Hiji mangsa manehna nampa surat ti juragan Wadana kota, nyarioskeun aya lowongan Jurutulis Wadana di kota, ku sabab Rd. Raksa geus lila jadi Jurutulis Camat, coba geuwat poe-poe
