Ieu kaca geus divalidasi
Peupeuyeuman-peupeuyeuman,
cantigi dikali deui,
Peupeureuman-peupeureuman,
mahugi dipenta deui.
Peuyeum nangka-peuyeum nangka,
peuyeum sampeu dipotongan,
Meureun suka-meureun suka,
da deukeut jeung popotongan.
Pare seksek pare made,
turiang jadi di kolong,
Boro kasep boro hade,
diteang sakuna kosong.
Di dieu mah loba muncang,
muncangna karopong kabeh,
Di dieu mah loba bujang,
bujangna barohong kabeh.
Panyana teh enya muncang,
sihoreng tangkal bintinu,
Panyana teh enya bujang,
horeng geus incuan tilu.
Kadungdung kadongdong Cina,
nyiuk cai ku elekan,
Kaduhung kabina-bina,
nyebut nyai didelekan.
Kadungdung kadongdong Cina,
nyiuk cai ka Cieunteung,
Kaduhung kabina-bina,
nyebut nyai ka nu keumpleung.
119
