Manuk rengge saba ulam, - sok komo lamun geus jadi.
Manuk tukung saba reuma, - uyuhan jadi ka nyai.
Hayam cempa lalayaran, - matak teuing nyeri ati.
Hayam sawah dipiara, - abong ka nu apes diri.
Kalong cilik saba gedang, - sumedot rasaning ati.
Careuh beureum pasawahan, - tur dusun leuwih ti misti.
Aya nu dianjing cai, - aya anu diheroan.
Ajag lembur Daramayu, - naha bet kalangsu teuing.
Lauk panjang dina parung, - ari emut merod pikir.
Senggal hideung saba ranca, - tembong lelewa nu manis.
Kadeuleu langgir caina, - kayap-keyep anu geulis.
Tutut gunung keong reuma, - sumangga geura gek calik.
Belut sisit saba darat, - kapiraray beurang-peuting.
Ruas awi dirorekan, - pikir asa selang- seling.
Bentang baranang di imah, -samar bisa tepang deui.
Langgir cai leumpang ngijing, - kadeuleu kayap-keyepna.
Kuring teh kamenyan koneng, - rumaos kawiwirangan.
Sok hayang kapancar panday, - kaparengkeun ka nu geulis.
Manuk beureum saba eurih, - hate asa didudutan.
Jagong tuhur beunang ngunun, - dunungan bagea sumping.
Kararas daun kalapa, - teu aya nu ngabangbrangkeun.
Monyet hideung sisi leuweung, - susah teu aya tungtungna.
Ngan bati ngajahe leuweung, - nya pikir puyang-payingan.
Lampu tilu damar dua, - moal ngarancabang pikir.
Meong tutul saba kasur, - cing atuh kumaha kuring.
Piring jati dulang leah, - tinggaleun kari waasna.
