Ieu kaca geus divalidasi
VOC
Pangkur
- Tunda heula nu tatahar, nu sayagi di kota Tegalwangi, taun lima welas ratus, jeung salapan genepan, opat kapal urang Walanda carunduk, di Banten pan balabuhna, nu dipingpin ku Cornelis.
- Ku Cornelis de Hout Man, ti nagrina ka dieu geus arindit, taun lima welas ratus, reujeung salapan lima, wungkul dagang harita anu dimaksud, lila-lila jadi betah, ka lemburna narah balik.
- Tuan Cornelis de Houtman, reujeung anak kapalna teu saeutik, tingkah lakuna teu jujur, kasar karurang sopan, ka pribumi ngahina reujeung adigung, ngaheureuyan ka wanita, teu kenging meleng saeutik.
- Kulantaran teu saropan, jadina teh kabeh dipikaijid, dipikangewa dimusuh, ahirna maranehna, der diusir ka Banten teu meunang cunduk, atawa teu meunang datang, salami teu daek ngarti.
- Taun lima las ratusan, slapan tujuh anu jadi panambih, Cornelis de Houtman wangsul, mulang ka nagarana, kauntungan sanajan sabuku curuk, geus sarugemaeun pisan, sabab jalan geus kapanggih.
- Pan jalan ka Nusantara, ku manehna tetela geus kapanggih, ti harita beuki kumpul, loba kapal Walanda, nu ka urang mani ngaleut saban waktu, daratang ka Nusantara, jumlahna henteu saeutik.
- Kongsi dagang ti Walanda, teu ngahiji kalah ka timbul rungsing, saingan ribut jeung batur, reujeung pada baturna, lila-lila kapikir kongsi teh ngumpul, di hijikeun sabeungkeutan, ngajadikeun hiji kongsi.
36
