Ieu kaca geus divalidasi
- Pantes pisan rek kitu jeung teu ngartina, da harita teu cicing, Den Jaka Taruna, keur ngawatek ajian, nu ti Sunan Tegalwangi, “Si Watu ngampar,” nu karasa lir beusi.
- Keur ngarahuh diwales ku Raden Jaka, jol kampleng ditampiling, koloyong teu nangan, jeung bru nambru nangkuban, ngerejet tur usak-usik, jeung kokosehan, teu bisa hudang deui.
- Borobot teh bedil babaturanana, ka Jaka der ngabedil, da diri manehna, geus nenjoeun baturna, ngudupruk ti babaranting, geus kokosehan, henteu bisaeun indit.
- Raden Jaka anjeunna waspada pisan, sareng asak tingal, der luncat ka tukang, ka nu suwung tur lega, bari ngagero nu tarik, pok ka rencangna, “Nyarumput ka nu buni.”
- Raden Jaka jeung pangiring-pangiringna, nyarumput ka nu buni, di handapeun tangkal, nu dibalik tembokan, na lelegok sisi cai, jeung sabangsana, pokona slamet diri.
- Bedil beuki nambahan boborobotan, tapi taya nu tepi, euweuh nu ngeunaan, kalah ka wet ngeunaan, ka babaturan anu tadi, anu ngajoprak, boborot mandi getih.
- Beuki deukeut beuki deukeut eta sora, nu dordar sora bedil, ka emut ku Jaka, teu perelu dilawan, sanajan gagah jeung wani, atawa kuat, da puguh sidik bedil.
- Katambahan nu loba pisan baladna, lajeng Jaka pribadi, nya anjeunanana, sareng rencang-rencangna, ting kelesed ka nu buni, undur-unduran, mulih ka Tegalwangi.
- Sasumpingna ka Tegalwangi anjeunna, henteu talangke deui, anjeunna dipapag, ku Sunan Abdulwafa, tur anjeunna pok miwarti, “Raden kumaha, naha beres katampi?”
- Harita teh waleran Jaka Taruna, “Mugi teu bendu galih, badanten teu acan, jalaran eta maksad, ti urang kalah ditampi, ku neregtegna, sora borobot bedil.”
- Barang nguping laporan nu kitu pisan, Sunan kaget teh teuing kalintang benduna, anjeunna sasauran, “Lamun kitu mah Kumpeni, nangtangan perang, hayoh moal rek ngacir.
41
