Ieu kaca geus divalidasi
- Hayoh keprok para prajurit ti urang, ratakeun dina baris, pariksa gagaman, urang gempur ayeuna, reujeung kabeneran deuih, keur anjeun miang, ti Mataram baralik.”
- Saur Raden, “Duh Eyang alhamdulillah, nuhun ka nu sarumping, pangreugreug nambahan, nambihan kakiatan, kanggo ngajorag Kumpeni, iraha maksad, ngajorag ka Kumpeni?”
- “Ceuk Mama mah montong rek dilila-lila, isukan enjing-enjing”, saur Kangjeng Sunan, “Raden naha enyaan, wireh bejana Kumpeni, nyieun bentengan, di Basis Tegalwangi?”
- "Leres pisan nyieunna eta bentengan, nu ageung tina kai, sareng luhur pisan, tur tohaga rubakna, matak paur nu ningali," ceuk Raden Jaka, “Kurang ajar Kumpeni.”
- Harita ge prajurit kumpul sadaya, prajurit Tegalwangi, jumlahna mokaha, salapan ratus urang, diatur sarta dibagi, tilu pasukan, atawa tilu kompi.
- Sakolompok leuwih tilu ratus urang, masing-masing dipingpin, Raden Wira Saba, Raden Jaka Taruna, Raden Wira Tanu kumis, anu pertengtang, pasagi ahli jurit.
- Isukan teh isuk-isuk jung mariang, prajurit Tegalwangi, jung ka Medan perang, tur marawa gagaman, pedang, tumbak, bedog, keris, gada, jeung panah, jeung rea-rea deui.
- Sadatangna der ngatur siasat perang, Wira Saba nu mingpin, anu pangkulonna, Wira Tanu ti wetan, Jaka Taruna nu mingpin, beulah kidulna, prajurit geus sayagi.
- Kumpeni teh ku ayana riributan, kajadian kamari, terus gerak jaga, prajurit anu aslina, jeung bayaran taki-taki, deukeut bentengan, rada hareup saeutik.
- Di hareupeun bentengan siap sayaga, lengkep sanjata bedil, keur ngabasmi neunggar, Tentara Kasultanan, boh prajurit Tegalwangi, lembek dianggap, ku tentara Kumpeni.
- Tapi ari buktina mah beda pisan, prajurit Tegalwangi, nu lembek dianggap, harita katembongna, ku mata pihak Kumpeni, ngepung bentengan, ti tilu madhab bukti.
42
