Ieu kaca geus divalidasi
- Ayeuna sadaya sujud, sumeja rek ngiring ngabdi, naon wae pangeresa, Rahaden anu miasih, ieu paman sadayana, seja tumut siang wengi.”
- Jaka Taruna mihatur, "Sukur geus babalik pikir, pikeun paman sarerea, sarta sumpah bela pati, ngan dina waktu ayeuna, kuring masih ngaligincing.
- Kalungguhan tacan gaduh, tacan jeneng mingpin nagri, atawa ngolah nagara, sugan ka hareup mah hasil, dicelukan ku nagara, insya Allah paman ngiring.”
- ”Saleresna saha atuh, jeung bade angkat ka mendi, Raden Paman hayang terang,” ceuk pamingpin rampog tadi, nu sejen tungkul nu aya, nawiskeun sumerah diri.
- "Kula ngaran nu kahatur, Jaka Taruna nu asli, ti Tegalwangi pan asal, ari maksud nu diungsi, rek jarah ka Batulayang, pamugi tiasa panggih.
- Rek jarah ka makam indung, nu nelah Dewi Manisri, jeung ka Eyang Sunan Dam pal, duanana geus lastari, lamun nurutkeun sajarah, bejana parantos lami.”
- Tingraringeuh rampog bingung, nguping kasauran tadi, ti Raden Jaka Taruna, pok si Jarot teh miwarti, upami kitu Raden mah, putra Sutawangsa asli.”
- "Bener Paman memang kitu,” waler Raden lir nu sedih, si Jarot reujeung baturna, cung-cong nyembah mikaasih, sarta ngomong babarengan, tingaresod narah tebih.
- Duh Raden Paman sumujud, sembah baktos tawis asih, sareng neda sih hampura, keur tadi geus kumawani, ngunghak nyampelak salira, ka diri Raden pribadi.”
- Raden Jaka pok mihatur, “Eh Paman ulah rek lali, henteu kedah make nyembah, da kula sanes pamingpin, henteu gaduh kalungguhan, saperti bapa sim kuring.
- Rahayat biasa nurut, sinareng paman ge sami, ari bakti ka Pangeran, ka Gusti Nu Mahasuci, ulah nyembah ka umatNa, pan ti Gusti henteu widi.”
56
