Ieu kaca geus divalidasi
VIII. NGARURUG KA JAYAKARTA
Magatru
- Kacaturkeun Pangeran Dipati Ukur, disarengan Senapati, nguriling ka unggal lembur, dina jero dua sasih, meh teu towong saban waktos.
- Mepek balad nu jumlahna tilu rebu, nu kapilih wani jurit, tur barudak ngora wungkul, nu meunang asak ngalatih, nu ngarti kana komando.
- Malahan mah loba deui nu ngabantu, nambahan balad prajurit, ti luar Wilayah Ukur, ti Sumedang jeung Ciamis, Sawungganteng jeung Malangbong.
- Kitu deui Sagalaherang Cihaur, ditambih nu sejen deui, mere bantuan nu cukup, jumlahna henteu saeutik, ngarebu milu ngarojong.
- Bekelna ge keur tilu sasih mah cukup, pakarang loba tur kumplit, tumbak gobang, kujang duhung, ditambih keris jeung badi, bedog panjang reujeung peso.
- Nu minangka bedilna keur dina tarung, loba nu marawa bandring, jeung panah nu meunang nyipuh, ruruhit mani lalancip, sipuh peurah oray totog.
- Sabagian aya deui nu ngabantun, gada bareurat jeung linggis, pikeun mekprek kayu batu, nya kitu deui tampuling, nu seukeut paranti nojos.
- Bebekelan harita nu dibantun, beas uyah jeung tarasi, kitu deui kere lauk, lauk cai reujeung daging, ku prajurit digarandong.
- Keur cadangan kurang bekel waktu pupuh, dibaktakan sejen deui, kadaharan anu cukup, dina kuda mani rimbil, tonggongna pinuh ku momot.
- Mawa balad nu jumlahna opat rebu, arek merangan Kumpeni, nu gagah galede jangkung, nu kumplit mariem bedil, dilawan ukur ku bedog.
117
