Ieu kaca geus divalidasi
- Taun Saka keur sarebu lima ratus, jeung genep puluh panambih, Harita Dipati Ukur, keur ngatur rek indit jurit, ka Jayakarta nu adoh.
- Ceuk Masehi harita bulan Agustus, taunna sarebu leuwih, nepratus dalapan likur, tanggal poena teu panggih, Urang Sunda mo paraho.
- Isuk-isuk alun-alun Dayeuh Ukur, ngaliud pinuh prajurit, anu rek miang ngarurug, ka Jayakarta nu tebih, ngabaris keur diparios.
- Panglimana Pangeran Dipati Ukur, dibantu ku Senapati, Suranangga nu kamashur, tukang jurit ti leuleutik, geus kolot kekentong kahot.
- Kapetengan harita anu marilu, prajurit wijig pinilih, nepi ka mangpuluh-puluh, gagah rongkah brani mati, batan mundur kajeun bobor.
- Benteng Sunda nu ngiring Dipati Ukur, anu sikep tandang jurit, ti Batulayang Tumenggung, Demang Kahuripan sakti, sareng Umbul ti Malangbong.
- Den Ngabehi Yudakarta ti Taraju, Medangsasigar ge ngiring, katut Demang Saunggantung, Cutak Cihaur teu kari, Sagalaherang ge katon.
- Sakuriling alun-alun mani pinuh, ku barudak tambah istri, heurin usik ku nu nangtung, nempo dulur jeung salaki, ka medan jurit rek mios.
- Maranehna sanajan hatena bingung, nalangsa baris patebih, sadrah pasrah ka Nu Agung, bari teu weleh mumuji, nawiskeun nyaah ka kolot.
- Ngadaroa ka Gusti Nu Maha Agung, nu ngabela lemah cai, supaya warangsu unggul, salamet kabeh baralik, ulah aya anu maot.
- Kangjeng Dalem katingal maju lumungsur ka luar ti Srimanganti, diiring putra nu lucu, sinareng Garwa Den Sari, geugeut deudeuh mikasono.
- Panganggona kaprajuritan nu agung, lancingan hideung dijeupit, katingalna mani hurung, dijeupit ku pasmen kuning, dibeluit ku sinjang hejo.
118
