Ieu kaca geus divalidasi
- hokeun rahayat teu meunang kitu, dianggap henteu merenah, tandana henteu ngalarti.
- Saha jelema nu mungpang, boga karep embung mere upeti, tegesna anu murugul, baha arek ngalawan, singsieunan sarta ancam rek dihukum, ahirna rayat narima, nurut tunduk ka nu mingpin.
- Kahartos pisan dawuhan, mung pamugi teu jadi rengat galih, rek aya deui piunjuk, Dampal Dalem ngawejang, dupi cutak damelna naon nu baku, hak sinareng kawajiban, papancen padamel Nagri.
- Barang mireng patarosan, ti Den Cutak soal damel nu penting, Kangjeng Dalem wuwuh bendu, karaosna diunghak, tur dihina ku cutak nu karek benum, nyentak bari jeung tetenjrag, ngagedor meja ngalahir.
- Dasar bodo teu kapalang, ka Pangagung campelak kumawani, nanyakeun urusan kitu, estuning henteu sopan, bisi maneh bener-bener tacan weruh, Cutak ngan tadah parentah, kumaha carek Bupati.
- Jalankeun kabeh parentah, anu gede atawa anu leutik, anu husus tur nu umum, nu kilat jeung biasa, tah sakitu gawe nu jadi babaku, kawajibanana Cutak, nu didawuhkeun ku kami.
- Raden Cutak Batulayang, ngadangukeun Kangjeng Dalem wawarti, sanajan bari jeung bendu, anjeunna tetep tenang, teu paureun teu riuk tuluy murungkut, henteu keder henteu rempan, jigana teh beuki wani.
- Imut manis ngawaleran, dibarengan daweung ludeung teu risi, saurna sumuhun dawuh, saupami parentah, karaosna henteu adil pikeun umum, dongkap ka rayat ngoceak, margina ku abot teuing.
- Kangjeng Dalem Sutapura, benduna teh geus kaliwat ti misti, socana molotot hurung, rarayna ngembang wera, gantawang teh ngawakwak bari tutunjuk, tetenjrag jiga nu kalap, jiga pisan nu teu eling.
- Meugeus maneh tong nyarita, loba omong molongpong tanpa eusi, ngabaceo lir nu linglung, geus sangeuk ngade-
39
