Ieu kaca geus divalidasi
- salambar teu busik, manehna heran, mangsar-mingsir rek ngacir.
- Raden Ukur nyaur jeung bear marahmay, seepkeun sing beresih, bisi panasaran, hayoh Mas kapetengan, teh eta ayeuna ganti, gobang nyulangrang, lugas keur tanding deui.
- Suranangga serepet mesat gobangna, tuluy dialak-ilik, prak diabar-abar, sarta dihumbat-heumbat, maksudna mah meureun mancing, keur ngagigila, musuhna sangkan gigis.
- Den Ukur mah tagen teu mundur salangkah teu pisan gigis miris, nu narenjo reuwas, loba nu ngaroceak, awewe pating jarerit, nenjo gagaman, nu ngabar mani lancip.
- Komo deui garwana jeung mertuana, pareureum bari nangis, bawaning baluas, mareumpeunan socana, inggis nu dipikaasih, apes kasoran, pupus di medan jurit.
- Raden Ukur geus gilig bade ngayonan, tagen taya kagimir, palayeun uninga, wewesen kapetengan, raksukanana digiling, meubeurkeun sinjang, pageuh dibulat-beulit.
- Pakarangna mangrupa badi pusaka, na angkeng teu ditolih, ceuk emutanana, moal rek ngabinasa, sanajan musuh nu bengis, tetep karunya sugan heug jadi eling.
- Suranangga heat nyabetkeun gobangna, ngahiuk mani tarik, ngarah mastakana, mun keuna tangtu beulah, tapi memeh gobang tepi, mani sakilat, pigeulangna ditarik.
- Ditarikna bari dicentok meueusan, rikat nyingcet kagigir, clik gobangna ragrag, lajeng mundur salangkah, Raden Dipati ngalahir, kop cokot gobang, bisi rek nyoba deui.
- Hemar-hemir kojengkang nyokot gobangna, Suranangga teh gasik, heat deui nilas, hantem dibabuk lalay, angkengna anu diijir, nu satakerna, sangkan musuh lastari.
- Raden Ukur teu balangah rikat luncat, sarta nyingcet saeutik, gobang henteu keuna, teu antel-antel acan, tarik-tarikna ngabanting, Ki kapetengan, ngoleweng rek tiguling.
- Keur kitu teh ku Raden dijejek pisan, bru labuh mani nunggir munggah kokosehan, bari haharegungan, nu lalajo ger sareuri, eak-eakan, lir nu nongton kamedi.
- Suranangga ngadenge nu susurakan, ngulisik hudang
55
