Ieu kaca geus divalidasi
- Nyaur kitu heat ngababuk Ki Sura, untung Ki Sura telik, geus bisa kelidna, malum tukang ujungan, panggebug teu nenggel tarik, hoe karamat, keuna ukur nagaris.
- Ku matihna teteken hoe karamat, sanajan mung nagaris, panas karasana, Sura kapengpeongan, nyampoyong jiga teu eling, meh kapihuan tina bakating nyeri.
- Kangjeng Dalem ka Suranagga nyaketan, bade dipindo deui, Raden Ukur rikat, jleng luncat ngarapeutan, si karamat keur ngulawit, lajeng ditewak, pageuh teu lesot deui.
- Dibebetot digubag-gabig dipaksa, pageuh teu lesot deui, malahan jigana, beuki mageuhan pisan, Kangjeng Dalem najan bengis, seep napasna, mureleng ka Dipati.
- Raden Ukur nyeh gumuujeng sasauran, Dampal Dalem bet lali, papayung Nagara, kalungguhuan nu jembar, salira pangkat Bupati, kersa ngayonana, Ki Sura pangkat leutik.
- Sareng deui dupi nu gaduh dosa mah, abdi Dalem pribadi, nu nyanggh pangersa, anu parantos baha, sumangga ayena ngahiji, nu dibenduan abdi Dalem sayagi.
- Alah sia cucungah nepik ka nantang, ieu bisa can ngarti, kana kagagahan, sarta kadigjayaan, teu aya hiji Bupati, di sa-Pasundan, anu wani ka aing.
- Ieu deui henteu pira pantar sia, diangggap tai ceuli, ukur pangkat Cutak, peupeuleukeuk ngalawan, lir weureu gadung teu eling, wani campelak, rasakeun leungeun aing.
- Eta meureun tas ngumbara ti Mataram, nya campah kumawani, lamun bener sia, enggeus bosen di dunya, rasakeun paneunggeul aing, hoe karamat mo bisa usik deui.
- Ku emutan teu kedah ngahina basa, abdi Dalem lastari, ayena kasoran, ku Dampal Dalem pisan, iklas tumamprak teh teuing, kana pangersa, Pangeran Nu tingali.
- Abdi Dalem moal wegah moal sungkan, sumangga geura uji,anggo karongkahan, kalayan kadigjayan, meungpeung seueur nu ningali, pikeun saksina, wewesan nu pinilih.
- Ku bawaning teteken teu bisa lepas, teu lesot ditatarik, teu icaleun akal, Kangjeng Dalem narajang, gabrug ngarontok Dipati, matek ajian, nyepengna mani ngancing.
71
