Ieu kaca geus divalidasi
- neng ge aya, pilemburan tingjarumpluk, rada anggang paturenggang
- Matak kagagas jeung sedih, ningali tangkal kalapa, paselang jeung tangkal jambe, ngaronyok tangkal kawungna, kawas nu ngaleulewang, rentul lir payung Pangagung, lambang ka nu eukeur nyawang.
- Kahibaran layung kuning, teu beda jeung payung menak, menak agung ti kadaton, nu make udat peremas, kiwa tengen walungan, Ciwidey reujeung Cisangkuy, caina ngarendat bodas.
- Keur anteng-anteng ningali, kagebah ku dadanguan, ku sora tonggeret banen, jeung pepengeng patembalan, horeng enggeus reup-reupan, lajeng bae gura-giru, nareraskeun perjalanan.
- Di jalanna teu kawarti, kira-kira wanci Isa, ka pakemitan geus anjog, kabeneran caang bulan, negrak kawas ti beurang, mega nyingray suwung mendung, lenglang teu aya panghalang.
- Rea anu balawiri, jelema nu ngaburabung, tamba sare sore-sore, jalan-jalan cari hawa, meungpeung keur caang bulan, nu rek ngaronda jeung tunggu, geus araya di tempatna.
- Kapendak ku nu marulih, nu aya di pakemitan, nu jaraga mani rame, ngawarangkong silih tempas, bari jeung gogonjakan, jigana narunggu waktu, giliran ngider ngaronda.
- Barang garduh nu kahiji, nu jaraga beulah Wetan, bareng ka kaluar nempo, narenjo nu tunggang kuda, tetela Raden Cutak, mani raong nu tarunggu, wilujeng sumping haturan.
- Bubuhan menak sajati, teu adigung adiguna, enggal ngawaleran alon, sarta budina someah, nuhun-nuhun saurna, salila kula keur ngantun, henteu aya panca bahya.
- Saurang ti nu keur jagi, brek cingogo bari nyembah, ngawalon ka nu marios, hibar pang doa Gamparan, berekah aman pisan, saur Raden sukur atuh, bari teras deui angkat.
Sinom
- Nyelang malikan katukang, ibu rama Enden Sari, sadikantun ku putrana, Cutak sepuh jaler istri, nu araya di bumi,
79
