Ieu kaca geus divalidasi
- Anu geulis pok ngalahir, dibarengan dulak-dilak, socana cureuleuk mencrong, lir nu timbul panasaran, jeung rada ngadeukeutan, ari Engkang na wet kitu, nu haat dipulang moha.
- Diwaler jeung amis budi, Engkang mah ngarasa melang, mangkaning nyorang nu jolok, bok bisi kumaha onam, sakitu tarahalna, kapan ka Dayeuh teh jauh, lain ambaheun nyorangan.
- Sok komo lamun pribadi, nyalira cecelengcengan, ayeuna mah antos bae, mun geus aya kapastian, tangtos enggal dipapag, Enden teh sing sabar nunggu, keur dua tilu dinten mah.
- Ti dinya Raden Dipati, dijajapkeun ku garwana, dugi ka babancik bae, para menak nu sanesna, ngarantosan di latar, sadayana geus kantun jung, sakudana-sakudana.
- Kuda nu bade dititih, keur Raden Ukur geus jagrag, Ki Mardawa nu ngagodeng, anu bakal ngagaundalan, rencangna nu satia, teu kungsi lami burudul, nu jalengkar mani ngantay.
- Ti payun Juragan Patih, Raden Ukur nu kadua, anjeunna parantos waleh, nolak teu kersa ti heula, ku jalaran saurna, teu wasa mungkuran sepuh, sok bilih matak tideuha.
- Aleutan menak nu tadi, ka luar ti pakemitan, masih rebun-rebun keneh, geus liwat carangcang tihang, harita titingalan, pilemburan tingrunggunuk, matak waas campur kelar.
- Jelema nu rek tarani, nu tarurun rek ka huma, ting kurumuy los ka kebon, nyoren kujang mawa parang, gaet atawa congkrang, diharudum manggul pacul, bari jeung nyorendang koja.
- Maranehna gok kapanggih, jeung aleutan para menak, henteu tuluy leumpangna teh, reg areureun dodongkoan, caringogo sagala, kitu tata nu kapungkur, hormat di jaman harita.
- Manuk geuri tingcaruit, recet dina tatangkalan, jogjog recok ngararoceh, ti anggangna hawar-hawar, cangehgar disarada, manuk leuweung jeung kasintu, lir ngabageakeun beurang.
89
