Ieu kaca geus divalidasi
- Nu keur nyuuh ku Anjeunna dicaketan, bajuna prak ditarik, bari jeung diangkat, dijungjungkeun meueusan, supaya jung nangtung deui, Sersan teh hudang, maksakeun najan nyeri.
- Saur Dalem geus kieu anjeun kumaha, arek ngalawan deui, Sersan teu nembalan, tapi masih amarah, sanajan awak nyareri, beungeut barabak, tetep bae umaing.
- Kumis baplang ayeuna mah rada ngambay, cokrom nutupan biwir, geus henteu diusap, anggur kek hulu pedang, serepet dipesat gasik, gugurilapan, paur anu ningali.
- Ana hiuk disabetkeun tarik pisan, kesit Kangjeng Dipati, salira ngagiwar, pedang sidik ngaliwat, Sersan ampir labuh deui, jajarigjeugan, nyabetna tarik teuing
- Kangjeng Dalem Sersan teh pek diheureuyan, saurna imut manis, kade euleuh geuning Sersan, naha bet pupuasan, ulah labuh deui, bisi ngagoak, heug ceurik cara tadi.
- Nu keur ngambek hayoh make diheureuyan, atuh beuki mudigdig, ku tina ambekna, ku leungeun duanana, pedangna dibubat-babit, ngababi- buta, henteu dipikir deui.
- Kangjeng Dalem ku rikat cungcat-cingcetna, Sersan beuki teu ngarti, lir nyabet kalangkang, nu kulupat-kolepat, antukna ngarasa pusing, cape sorangan, napasna nyenen kemis.
- Ahirna mah beuki lila beuki eungap, kesangna lir nu mandi, geus jojolongjongan, jiga nu mabok arak, teu beda jeung nu teu eling, prak dirapetan, ditinjel lebah pingping.
- Di kitu teh pedangna ngaguprak ragrag, Sersan nambru tibanting, henteu walakaya, lir kapas kaibunan, ngeper leuleus tulang sandi, handapeun lontar, euweuh pisan bubudi.
- Ku Dipati Sersan tuluy dicaketan, pedangna pek dicapit, ku sampeanana, anjeunna sasauran, bari teu lesot ningali, Sersan nu gagah, pek geura hudang deui.
- Naha geuning jigana ngajak enggeusan, moal rek maju deui, kapan tukang perang, wet Sersan teu ceehan, henteu cara keur mimiti, siga rek ngakan, cing ka dinya sing eling.
- Aduh ampun henteu bisa walakaya, bari hudang ngulisik, diuk lalaunan, ngambekan runghap-renghap, bawaning
26
