Ieu kaca geus divalidasi
- Nu sejen lebeng teu ngarti, bangsa Jepang leuwih angot, Cina oge tangtu kitu, urang Batawi ge sami, ngan bati heran nu aya, henteu narepi akalna.
- Teu nyahoeun elmu gaib, wedalan ti Wali Songo, anu kamashur geus lepus, wewesen elmuning wasis, sok disebut pileumpeuhan, kaduana pangabaran.
- Tah ieu lamun kabeuli, dijabah ku Yang Manon, perbawa matak lumpuh, wawanen musuh teh leungit, leuleus leumpeuh tuna daya, nu matak loba nu heran.
- Sanggeus sidik katingali, Sersan nu gagah teh reyod, tuluy ku Dipati Ukur, tarangna enggal digaris, ditetel indung panangan, palebah pancasonana.
- Ngadadak ngorejat deui, hudang nangtung bari melong, tanagana timbul kumpul, ceuk manehna teu kaharti, urut sakitu leuleusna, ayeuna ngarasa jagjag.
- Gogodeg bari jeung seuri, Sersan teh tidinya ngomong, duh juragan Sunda ampun, rumasa geus eleh jurit, ayeuna arek sumerah, kumaha Juragan Sunda.
- Dawuhan Kangjeng Dipati, geuning Sersan teh ku tolol, ngaran mah Dipati Ukur, kaula jadi Bupati, ari Sunda ngatan bangsa, di daerah tatar Sunda.
- Jigana meureun kaharti, da terus manehna ngomong, bari hormat rengkah-rengkuh, hapunten Kangjeng Bupati, ulah jadi bendu manah, ku margi teu acan terang.
- Ayeuna Kangjeng Dipati, bilih bade ngaborogod, moal baha asal hirup, sareng nu sanesna deui, supados sami sumerah, seja hormat ka Pangeran.
- Kangjeng Dipati ngalahir, Sersan moal diborogod, mun aranjeun unduk taluk, ayeuna mah urang indit, meungpeung masih rada beurang, sugan moal kapoekan.
- Barang sanggeusna tarapti, teu seueur deui carios, tuluy indit mani ngabrul, samemeh indit diantri, rek neraskeun perjalanan, ngajugjug ka pasanggrahan.
- Pangheulana Senapati, kapetengan Jayengrono, jeung Suranangga ti payun, dina kuda tingbaligbrig, anu jadi tuduh jalan, sarta jeung jadi pangawal.
28
