Ieu kaca geus divalidasi
- margi kapan basa teh, kalebet gambaran rasa, nu jadi kayakinan, upami rasa teu tepung moal aya kaiklasan.
- Ngadangu anu wawarti, Adipati Bahureksa, sakedap melengek bae, katara dina budina, kawas henteu sugema, bendu ka Dipati Ukur, ana pok teh sasauran.
- Pamadegan ti Kangrai, Kakang henteu ngarempagan, talajak kitu teu sae, jiga nu hayang macakal, mawa karep sorangan, ka Kakang jiga mo nurut, rek misah sewang-sewangan.
- Dalem Ukur imut manis, bari teras sasauran. sumeja balaka bae, rai Dalem teu tiasa, ngarempagan pangersa, jalaran henteu kaemut, baris pisaeeunana.
- Saliwatan ge kaharti, geus kasinggung kalungguhan, Pangeran Bahureksa teh, geus beuki tambah benduna, enggeus ilang duduga, asal lemes ganti lagu, ahirna mah nyugak pisan.
- Mun kitu tetela sidik, anjeun lain rek mantuan, tapi boga niat goreng, rek ngamusuh jeung merangan, meureun rek babarengan, jeung Kumpeni rek samiuk, rek ngajajah ka Mataram.
- Dipati Ukur ngalahir, henteu robah ganti lagam, sanajan geus diceceleh, dihina luar biasa, henteu kasar suaban, tengtrem ayem teu angguklung, basana tetep merenah.
- Raka Pangeran Dipati, Rai Dalem tetep nolak ku margi henteu kahartos, teu rumaos gaduh maksad ngamusuh ka Mataram, sok komo kudu samiuk, ngahiji sareng Walanda.
- Saksi bumi sareng langit, seja sumpah ka Pangeran, ka Nu Murbeng Alam kabeh, salamina kumelendang, moal sabilulungan, tebih ngahiji ka musuh, sok komo bade ngajajah.
- Margina tangtos kagalih, ngaran-ngaran nu dijajah, sanajan ku saha bae, Rai Dalem moal nyerah, sanes jalma beulian, jiwa Sunda lulus mulus, teu dijajah moh ngajajah.
Wirangrong
- Barang Pangeran Dipati, Kangjeng Dalem Bahurek-sa, nu keur bendu ngagugudug, ngadangukeun nu wawarti, anu sakitu tandesna, pasemon jadi marahmay.
33
