Ieu kaca geus divalidasi
- Bet ngadadak amis budi, lir seuneu hurung diceos, daya aji Kangjeng Ukur, tirta maya lebet batin, perbawa seuneu musna, Bahureksa sasauran
- Kakang teh Rai Dipati, bet hilap nembe karaos, reh tadi henteu ngagugu, nyarios henteu dipikir, rumaos kirang emutan, nyanggakeun kalelepatan.
- Dipati Ukur ngalahir, ku Rai Dalem kahartos, sawangsulna ulah bendu, jalaran ngaleuleuwihi, ingkar tina subasira, sihhapunten nu diteda.
- Kumaha pangersa Rai, sangkan tiasa patotos, silih angkat silih jungjung, lebeting ngusir Kumpeni, cobi Kakang neda warta, hayang ngupingkeun kapalay.
- Ku Rai Dalem katampi, sanajan samporet waktos, sumeja bade dijujut, mung bawiraos peryogi kauninga para putra, sareng Pahlawan sanesna.
- Leres urang saur gasik, supados sadaya ngartos, jalanna ngagempur musuh, antosan mo lami deui, tinangtos baris darongkap, lajeng bae miwarangan.
- Bari nunggu nu sarumping, Adipati Bahureksa, nalengteng Dipati Ukur, mariksa ti mana kawit, dugi kana kumawula, jadi Pahlawan Mataram.
- Daradad Kangjeng Dipati, anjeunna muka lalakon, ti awal dugi ka tutug, dongkap ka anjeunna mulih, ngantun Sri Sultan Mataram, lajeng ngabujeng Pasundan.
- Kajadian nu parenting, patali jeung Ronggonoto, henteu pisan dipisaur, bubuhan suci beresih, teu wasa upat sinuat, tara ngagulkeun sorangan.
- Sakawitna teu kagalih, ku Pangeran Bahureksa, salira Dipati Ukur, sinatria nu lineuwih, seke seler Pajajaran, teu katawis urang Sunda.
- Ku jalaran katingali, na rengkuh sareng nyarios, estu teu benten sarambut, nambleg urang Jawa asli, teu ngaharib urang Sunda, anu matak kasamaran.
- Kocapkeun teu kantos lami, sadayana nu diantos, Senapati geus karumpul, merenah hempak caralik, dipayuneun Bahureksa, Suranangga oge aya.
34
