Ieu kaca geus divalidasi
- Bahureksa pok ngalahir, sowantenna leuleuy halon, nu matak kabeh disaur, ieu Pangeran Dipati Rahaden Wangsataruna, bade medar bab siasat.
- Siasat urusan jurit, supaya urang teu nolog, tata cara dina ngatur, pasang peta dina tanding, keur ngusir urang Walanda, sumangga geura ngawitan.
- Ngawitan Kangjeng Dipati, nyandak gambar tina kantong, ari breh teh mani pinuh, gambarna kota Batawi, kenging ngadamel anjeunna, Jurutelik nu laporan.
- Diterangkeun hiji-hiji, tempat Kumpeni nu tembong, kakuatan pihak musuh, bentengna anu parenting, kitu deui panjagaan, keur nanya nu lalarliwat.
- Pamungkas anu kawarti, Dipati Ukur nyarios, anu mangrupakeun usul, keur ngusir kaum Kumpeni, balad Jawa narajangna, ti beulah kaler jeung wetan.
- Balad Sundamoal cicing, sarua rek paeh poso, ngajorag ti kulon kidul, Kumpeni rek dibeberik, kidul kulon kaler wetan, ku urang kakurilingan.
- Sanggeusna asak badami, Adipati Bahureksa, Senapati jeung Tumenggung, para pahlawan nu ngiring, kana usul nyaluyuan, tuluy netepkeun waktuna.
- Ari anu katingali, rada baluar-baleor, jeung rea ngasongkeun usul, pangpangna ti Senapati, Adiraksa Citrareksa, henteu sami pamadegan.
- Dumeh ngarasa katitih, kauninga eleh jero, babakuna bab pangaruh, perkara tataning jurit, kaelehkeun kapinteran, luang paham pangalaman.
- Pangpangna nu paling sulit, nyawalakeun nu kaboyong, candakna Dipati Ukur, Kumpeni anu kacangking, kahoyongna Citrareksa, boyongan teh dipaehan.
- Margina sidik geus bukti, jarahatna teh katembong, tapi ku Dipati Ukur, diwagel tong dipateni, lantaran kitu teh ingkar, tina tata peperangan.
- Citrareksa muril kumis, pok nyaur jeung poporongos, atuh ari lembek kitu, rea omber ka Kumpeni, pimanaeun bisa meunang, lawan moal mika serab.
35
