Ieu kaca geus divalidasi
- Sinatria nu lineuwih, ningali nu poporongos, Kangjeng Adipati Ukur, henteu ngalawanan bengis, mesem ayem tetep sopan, pok ngawalon lalaunan.
- Pamugi ulah rek lali, sanes kedah lembek asor, mugi emut kana hukum, hukum perang tata jurit, henteu kenging ngabinasa, musuh nu serah bongkokan.
- Citrareksa nyaur deui, kumaha lamun ngaleos, atawa lumpat malabur, sarta bisa balik deui, ngahiji reujeung baturna, rusiah urang kabongkar.
- Tawanan kudu dijagi, sangkan ulah bisa lolos, pisaur Dipati Ukur, lamun maksa nyobi-nyobi, rek minggat tina tahanan, nembe kenging dipergasa.
- Tumenggung ngagakgak seuri, mung tetela seuri sombong, ngahina Dipati Ukur, lamun kitu matak pusing, urang nyanghareupan perang, jeung ngajaga patalukan.
- Mending ge gancang dibasmi, ka urang moal rek nembrong, musingkeun saumur-umur, ngalobakeun gawe kulir, katambah kudu maraban, ka musuh anu jarahat.
- Sanajan Kangjeng Dipati, jelema nu handap asor, dihina mah timbul bendu, pok misaur rada bengis, ambeu Raden Citrareksa, singhoreng dugi ka dinya.
- Ari palay wareg meuncit, henteu kedah poporongos, engke bae dina tarung, beakkeun kabeh Kumpeni, entong aya anu nyesa, nepi ka getih-getihna.
- Boyongan kaum Kumpeni, nu ayeuna tembong jonghok, ku kaula rek dibantun, bilih di dieu mah heurin, pacuan dirogahala, sabab tanggungan kaula.
- Bahureksa teh ningali, Dipati Ukur nu sewot, anjeunna gancang misaur, maksudna mah meureun nyapih, paur ka nu jadi putra, bok bilih kawiwirangan.
- Raden Tumenggung tingali, pacuan didamel abot, adu renyom kudu padu, andika tong ngiring pusing, sanggakeun ka nu kagungan, da puguh boyonganana.
- Citrareksa lir nu isin, merengut bawaning dongkol, gudad-gadeud tuluy nangtung, leos bae terus indit, kekerot bari jeung ngancam, saurna matak hanjakal,
36
