Ieu kaca geus divalidasi
- dinya, mani pinuh ku kakayon nu jarangkung, turta garomplok daunna, mangrupakeun aling-aling.
- Prajurit teh tingkarandang, tingkodongkang, nyalingker ka nu buni, nyararumput gurung-gusuh, sok sieun kanyahoan, katembongeun ku lawanna pihak musuh, sieun kacerek ti heula, marubus pabuni-buni.
- Pamingpin pasukan Jawa, tina kuda isarah pek ngahuit, marentah supaya maju, baladna gancang nyerang, geura gempur boyongan, Dipati Ukur, pingpinan Ki Suranangga, supaya gancang dibasmi.
Durma
- Ningal tandang Suranangga anu gagah, Senapati lineuwih, reujeung jungkiringna, dedeganana Sersan, taya hiji anu wani, rek ngadeukeutan, narangtung di nu tebih.
- Ngan saukur wani malengpeng ku tumbak, kitu ge ti nu tebih, tayaanu keuna, sakadar dipaparah lolobana henteu tepi, lantaran anggang, henteu matak balai.
- Kocap Sersan ayeuna bijil napsuna, hatena jadi wani, teteg boga rasa, aya nu ngabelaan, katurug-turug nu penting, pestolna tea, dipaparinkeun deui.
- Tapi Sersan diomat-omatan pisan, diwagel ku Dipati, ulah ngabekasan, upama teu kapaksa, atawa ngabela diri, bisi binasa, lebah dinya mah kenging.
- Harita ge ku Sersan kungsi di coba, dibekaskeun sakali, ukur buang obat, teu ngabedil enyaan, ngan ditujukeun ka lagit, keur nyingsieunan, musuhna sangkan miris.
- Dalem Ukur ngelemet milari tempat, nu deet tur teu tarik, anjeunna ngaraas, maksadna bade meuntas, Cihaliwung henteu tarik, tur kabeneran, deet nengahan bitis.
- Najan angkat di nu poek sarta bala, tapi Kangjeng Dipati, lengkah reujeung tincak, nu dibarung ku rasa, jiga aya anu narik, sakolepatan, ka peuntas enggeus sumping.
- Ti dinya mah anjeunna seselendepan, teu beda reujeung ucing, nu ngintip /mangsanna, ngeteyep lalaunan, bade nyampeurkeun pamingpin, nu dina kuda, tagogna ieu aing.
40
