Ieu kaca geus divalidasi
- Sanggeus deukeut gancang dirawel sukuna, beubeurna prak ditarik, pamingpin balangah, teu nyangka keur diarah, da puguh meureun keur mingpin, keur ngapalaan, baladna nu rek jurit.
- Ku Dipati rikat dibedol ka handap, pamingpin ngagurawil, nepi ka bru ragrag, nyangkere henteu obah, geus ninggang rungkun cantigi, kudana ngejat, beretek ka nu suni.
- Pamingpin teh ngagoak tulung-tulungan, lir budak bae badis, bari roroesan, kokosehan rek hudang, prak diburu ku Dipati, nyepeng dadana, bari pok nyaur bengis.
- Lamun bener andika narah cilaka, ulah rek jerat-jerit, anggur seug marentah, celukan kabeh balad, supaya ngeureunan jurit, panarajangan eureun samasakali
- Barang sidik katingalieun beungeutna, geus henteu samar deui, nu jadi pingpinan, Tumenggung Adireksa, putrana Kangjeng Dipati, wakil Sri Sultan, anu rek niat julig.
- Adireksa sanggeus leungit kareuwasna, tur bisa ajeg deui, geus bener nangtungna, anjeunna tetep bedang, henteu nurut ka Dipati, malah ngalawan, kusiwel nyabut keris.
- Bari tuluy ngocomang tulung-tulungan, tapi ku Adipati, henteu diomberan, pek disintreuk tarangna, Tumenggung ngagerung nangis, nyerieun pisan, henteu era ngawiwiw.
- Dalem Ukur ningali nu gegerungan, anjeunna imut, manis, lajeung sasauran, aduh ampir kalinglap, bet geuning pamanggul jurit, banteng Mataram, teu sangka wani jalir.
- Lamun anjeun hayang ngadu kakuatan, ka kula ngajak tanding, nyoba kadigjayan, ngadu patutunggalan, hempek geura taki-taki, ayeuna pisan, kaula moal indit.
- Tumenggung teh ngeheneng teu ngawalonan, ngawiwiw bae ceurik, nyekelan mastaka, katibanan ajian, perwasana semu gunting, teu walakaya, laleuleus tulang sandi.
- Ti beh landeuh murudul aya nu datang, aya genep prajurit, maresat gobangna, muru dununganana, Dipati Ukur ngalahir, tur rada bedas, aeh para prajurit.
- Mun sampean rek nyalametkeun dunungan, pacuan kumawani, deukeut ka kaula, pek caricing di dinya, sabab41
