Ieu kaca geus divalidasi
- pikeun pati hurip, Den Adireksa, kaula anu nyangking.
- Mun teu nurut tinggal ngagotong mayitna, pilih salah sahiji, moal rek kapalang, ka jelema nu bedang, heug tampanan ieu keris, barang pusaka, nelah si Gagakputih.
- Nyaur kitu bari jeung nyabut wangkingan, nu nelah Gagakputih, herang ngabaranyay, ngagebur cahayana, matak serab matak gimir, matak kasima, ku geburna ge gigis.
- Prajurit teh saurang taya nu tandang, dareukeut ge teu wani, sok komo ngalawan, hareugeueun nu aya, helok dibarung aringgis, teu bisa peta, ngadegdeg lir nu tiris.
- Adireksa nu meujeuhna gegerungan, sakapeung ngabangingik, ku Dalem diusap, dina urut nyintreukna, ku perah si Gagakputih, ngadadak jagjag, ngorejat pok wawarti.
- Kangjeng Dalem kaula rumaos pisan, estu sisip pangarti, kawon kadigjayan, kasakten kasatrian, moal kumawantun deui, sadaya-daya, nyanggakeun pati hurip.
- Paripaos dicacag diwalang-walang, digisik jadi cai, moal pisan baha, kaula seja sadrah, tumarima kawon jurit, perang kasoran, neda sih pangaksami.
- Dalem Ukur ngawaleran lalaunan, bari telek ningali, Raden Adireksa, ulah rek kikituan, Kakang tetebiheun teuing, mun aya maksad, nelasan ka Kangrai.
- Diri Kakang seja pisan ngahampura, mung tumaros saeutik, na naon margina, sareng naon maksadna, anu mawi tadi Rai, wantun ngahadang, ka Kakang nu keur balik.
- Taya sanes jalaran ku kabodoan, Rai Dalem pribadi, sareng lanceuk pisan, anu ngabobotohan sangkan megat nu marulih, karaos pisan, estu lepat pamilih.
- Mun kitu mah Kangrai ngemban timbalan, parentah anu penting, ti Den Citrareksa, hanjakal jeung anjeunna, kaula henteu papanggih, rek sakalian, ngayakeun perang tanding.
Kinanti
- Ku Rai mugi didangu, Kakang teh mere pepeling, enggoning rek sasarengan, ngajalankeun darma bakti, pikeun ngabela Nagara, poma rek pahiri-hiri.
42
