Ieu kaca geus divalidasi
- Rek paluhur-luhur tangtung rek nembongkeun ieu aing pagirang-girang tampian, tur teu make temah wadi sok komo mun disarengan ku manah nu teu beresih.
- Mun kitu pinasti ancur akibatna baris rugi kadang kala balik ngaran musuh mah ngareunah seuri tah ieu kedah dicegah, Jalanna ngan ku saati.
- Kakiatan anu ampuh sanes dina congo bedil, ayana dina awak urang anu ngancik dina batin, mangrupa kapribadian, kayakinan anu suci.
- Pangpangna kudu saluyu, urang teh kudu ngahiji enggoning rek nyangga darma, ngusir semah nu rek dengki anu campelak cucungah, ngagadabah lemah cai.
- Piwejang sewu kasuhun diemutkeun siang wengi, ceuk Tumenggung Adireksa katingala lir nu isin, jigana meureun karasa, yen anjeunna nu geus julig
- Nuhun Kangrai mun kitu, pacuan uah rek lali, pangpangna urang jeung urang, ulah rek henteu ngahiji sok komo timbul karinah, antukna urang nu rugi.
- Mungguh tekad anu hasud, Kangrai meureun tingali ngancikna teh di jelema nu boga rasa umaing nu adigung adiguna, anu resep hiri dengki.
- Boga rasa leuwih punjul ngakukeun loba pangarti, panggagahna pangrongkahna nu beunghar sakolong langit, jeung ngaku pangkawasana, di dunya mah euweuh deui.
- Jelema nu sipat kitu sok rea pisan kasakit, saperti henteu kaopan, teu paya aya nu leuwih, ngewa mun aya nu magak, kahayangna ngan dipuji.
- Padahal lamun dicukcruk, diteuleuman anu telik, sanajan ngakuna gagah lahuta jeung ieu aing batinna nyata borangan leutik burih tur jejerih.
- Kalungguhan sieun turun, pangaruhna sieun leungit. kasoro kakawasaan, kahormatan kitu deu sangkan teu aya rintangan, sok ngarinah jeung ngadoni.
- Budi parangi nu kitu, mun seug jadi Senapati, teu kaasup Sinatria, ngahucuhkeun ka nu leutik kajeun rayat letik, kajeun rayat jadi korban, asal aing ngeunah seuri.
43
