Ieu kaca geus divalidasi
- Di mana lamun keur unggul, teu euleum-euleum umaing, agul ngaku pangpunjulna, nulak cangkeng muril kumis, narah kadampal kalangkang geus teu nolih ka prajurit.
- Kaunggulan anu mulus, anu langgeng moal leungit, bakal bisana kahontal, anging jalanna ku suci, tegesna ku kaiklasan, keur ngabela lemah cai.
- Sakitu oge geus cukup, Kakang ka Rai mepeling, pamugi ka sadayana, di dugikeun ku Kangrai, pangpangna ka tuang Raka, jeung ka para Senapati.
- Supaya anu dimaksud, urang teh bisa ngahiji, ulah timbul pacengkadan, nu temahna matak rugi, nguntungkeun pihak Walanda, atawa pikeun kumpeni.
- Raden Tumenggung tumungkul, ngahuleng jiga nu mikir, gemet ngabandunganana, siga nyerep kana ati, ngan sumuhun ngawalerna, ditambih teu lepat deui.
- Reungeukeun Rai Tumenggung, Kakang rek hatur tingali, bade brukbrak terus terang, sok mindeng manggih kanyeri, teu raos ku urang wetan, ulah karandapan deui.
- Anamung sadalah kitu, teu weleh Kakang teh mikir, dugi ka wangkid ieu mah, napsu teh bisa diaping, sareng emut balukarna, lamun pecoh matak rugi
- Sadaya nu dipisaur, abdi Dalem kantos nguping, malah abdi Dalem pisan, mung pamugi lahir batin, sih hapunten nu diteda, Tumenggung megat ngalahir.
- Tong kagungan manah kitu, Kakang mah sanes ka Rai, rek neumbleuhkeun kasalahan, ieu mah sangkan tingali, nyarioskeun pangalaman, ulah kajadian deui.
- Upami Raden Tumenggung, palay tingali nu sidik, Ki Jayengrono pariksa, lalakon Kakang bihari, keur ngaderek di Mataram, ngawulaan Sri Narpati.
- Kakang ayeuna rek wangsul, Rai ge meureun rek mulih, sareng muga ulah lepat, teraskeun pisanggem tadi, sareng muga ngahampura, jelema sok owah gingsir.
- Ti dinya terus malungkur, arangkat ti sisi cai, sabaladna-sabaladna, dicarandak masing-masing, nu ka kulon nu ka wetan, sadayana geus marulih.
44
