Ieu kaca geus divalidasi
- Boyongan Dipati Ukur, anu katumbak dicai, nepi ka hanteuna pisan, dikubur di sisi cai, handapeun tangkal kalapa, Dipati Ukur meh nangis.
- Di jalanna teu kacatur, nu marulih geus tarepi, kira wanci haneut moyan, sanajan teu pati tebih, jajalaneun pinuh rawa, kawuwuh angkat ti peuting.
- Ningali anu carunduk, sadayana Senapati, pahibut kabeh marapag, nyanggemkeun wilujeng sumping, paroman bear marahmay, nawiskeun saruka ati.
- Ningali nu muru-muru, ngabageakeun nu sumping, Dalem Ukur ngawaleran, imut jeung manggut saeutik, rupina bawaning palay, anjeunna henteu wawarti.
- Ari nu alewoh ribut, ngadogeng mani ngecewis, Senapati Suranangga, mani imeut tur taliti, ti sabarang jung mariang, nepi ka mulang na deui.
- Boyongan terus diatur, dipernahkeun anu tartib, ngawungkul di hiji kemah, tur dijaga ati-ati, bok bisi aya nu minggat, anu ngajaga caringcing.
- Kacaturkeun hiji waktu, sadayana Senapati, ditambah ku kapetengan, dikempelkeun jadi hiji, kersana babarempagan, sayagi rek indit jurit.
- Baladna nu opat rebu, dipencar dibagi-bagi, diatur luareun kota, tapi deukeut ka Batawi, ti kidulka kulon parat, pertahanan rekep rapih.
- Unggal rombongan diatur, sanajan bagian leutik, kabeh aya pamingpinna, anu kudu ngatur jurit, dina waktuna ngajorag, ulah rek pahiri-hiri.
45
