Ieu kaca geus divalidasi
IV. TARUNG JURIT JEUNG KUMPENI
Pangkur
- Sagala paparentahan, gancang bae teu diengkekeun deui, harita terus dipaju, sacabak-sacabakna, aya anu nyarieun lombang keur nyumput, nu nuaran tatangkalan, kalapa reujeung kacapi.
- Keur nyarieun kandang jaga, diaturna sisi kemah nu penting, nyegah panarajang musuh, mun aya nu ngajorag, memeh asup enggeus kaburu kakepung, musuh nyerang pasti beunang, moal bisa balik deui.
- Pasukan luar biasa, nu katelah pasukan Jurutelik, saban peuting tingkurusuk, nalungtik rerencepan, keur nyirian pijalaneun pikeun asup, geusan narajang ka kota, pijalaneun geus katungtik.
- Malah aya sarombongan, jurutelik golongan nu warani, diluluguan ku Umbul, Umbul ti Batulayang, geus barisa mareuntas ka Cihaliwung, norobos ka sisi kota, beulah kidul sisi cai.
- Di dinya mah longsong pisan, pangjagaan kawasna paling sepi, sabab loba tanah suwung, ukur kebon kalapa, nu paselang jeung dungus nu tingrunggunuk, atawa jeung kekebonan, tinggarumpluk teu ngahiji.
- Jurutelik pada terang, di dinya teh katembong benteng leutik, tapi teu bisa kaukur, kakuatan musuhna, ngan katingal aya Walanda nu nangtung, pulang anting leuleumpangan, deukeut benteng manggul bedil.
- Reyem-reyem cahya bulan, samemena gawena jurutelik, tingsulumun dina ruyuk, leumpang sasalingkeran, ku nu jaga jurutelik teu katimu, teu bisaeun kanyahoan, tingsulusup di nu buni.
- Ki Mas Umbul Batulayang, gasik naek kana tangkal kacapi, ngawaskeun tempat nu jauh, keur netepkeun siasat, 46
