Ieu kaca geus divalidasi
- nyumputna baruni henteu kasusul, teu matak nimbulkeun korban, henteu aya nu balai.
- Sanajan hantem-hanteman, kumpeni teh henteu eureun ngabedil, nu ngarepung henteu mundur, terus ngangseg narajang, teu sieuneun ku mariem tingjalegur, enggeus baruleud tekadna, rek ngusir anu ngalindih.
- Kacaturkeun malem Ahad, anu enggeus meunang asak badami, campleng dina pukul tilu, sakabeh balad Sunda, geus sadia mareuntas ka Cihaliwung, tur samakta rek narajang, ngarurug kota Batawi.
- Henteu lila gancang tandang, sabagian enggeus haranjat deui, daratang ka beulah ditu, meuntas ka beulah wetan, leumpang anca maraju teu gurunggusuh, tingkarayap tingkorondang, lalaunan ati-ati.
- Tamtama jeung Kapetengan, dibarisan nu pinilih warani, pangheulana bari ngatur, mingpin pasukanana, Dalem Ukur angkatna teu pati jauh diiring ku Suranangga, kana benteng geus meh tepi.
- Barang geus dareukeut pisan, kabetahkeun ku nu ngajingjing bedil, anu geus dipasang sangkur, Dipati Ukur rikat, teras ngajleng ngarapetan pihak musuh, bari maparin isarah, Suranangga henteu cicing.
- Mani ngan sakedap netra, serdadu teh tingjaloprak ngaguling, tingkerejet tinggudubug, ngalaleupaskeun nyawa, ku lantaran beuteungna keuna panyuduk, gagaman Kangjeng Pangeran, nu nelah si Gagakputih.
- Nu saurang jajantungna, nu saurang hulu angen katiir, duanana tingkudupung, musuhna Suranangga, memeh rubuh bedilna geus kungsi bitu, ngabeledag tarik pisan, katambah keur sepi jempling.
- Sorana munggah eoran, jeung aweuhan meh sakuriling bungking, nu di benteng tinggurubug tingkorejat harudang, samar polah nepi ka ibur tagiwur, geumpeur teu paruguh cabak, kahudangkeun sora bedil.
- Ti golongan nu narajang, ger sarurak tarik asa kaindit, ayeuh-ayeuhan ngaguruh, bari jeung muru lawang, lawang
48
