Ieu kaca geus divalidasi
- Sasesana nu teu nyieun panyumputan, dipiwarang baralik, tur dipapancenan, ngajaraga boyongan, ngurus nu tatu jeung gering, nunggu parentah, sadia jurit deui.
- Dalem Ukur jeung Kaperengan pilihan, kekentong dina jurit, tetep henteu robah, henteu ka pasanggrahan, tatan-tatan maju jurit, nu kaduana, ngatur siasat deui.
- Panarajang golongan pihak Mataram, palih wetan teu hasil, henteu beubeunangan, sabab palebah dinya, baladna pihak kumpeni, cukup tohaga, kuwat leutik ti misti.
- Mimiti mah arasup ka sisi kota, nyerang garagah wani, tapi kawalahan, teu kajabel bentengna, kapaksa malundur deui, ninggalkeun korban, jumlahna teu saeutik.
- Tambah-tambah Mataram katiwang-tiwang, estuning matak sedih, geus katunggaran, katarajang bahaya, loba nu keu- na panyakit, tajam jeung cacar, balad loba nu gering.
- Barang bray ge ti benteng pihak Walanda, tebeh kaler saeutik, sora mariemna, mani taya eureunna, geus patingjalegur deui, hantem-hanteman, jiga nu nangtang jurit.
- Ditojokeun ka lebah benteng nu beunang, kajabel peuting tadi, geus dicaricingan, ku wadya bala Sunda, ka Mataram kitu deui, terus-terusan, henteu eureun nganbedil.
- Ku lantaran panyumputan teh tohaga, jarero tur baruni, teu nimbulkeun korban, balad Sunda tarahan, sapoe jeput caricing, di jero lombang, margi bisi kabedil.
- Kacaturkeun dina peuting kaduana, wengian Senen Pahing, kabeh balad Sunda, geus ngayakeun gerakan, ka benteng nu hiji deui, kalereunana, sesa peuting kamari
- Ngajoragna saperti anu ti heula, wanci janari leutik, harita pohara, panarajangan hebat, leuwih ragot ti kamari, musuh sayaga, teu kabongohan teuing.
- Balad Sunda sanajan rea nu tiwas, tapi nyerangna hasil, sabab ahirna mah, waktu carangcangtihang, benteng musuh beunang deui, sarta Walanda, ka beulah kaler ngacir.
- Isuk-isuk waktu Dipati mariksa, ngaroris nu taliti, lajeng kauninga, Ngabehi Judakerta, ti Taraju sidik leungit, taya raratan, Kangjeng Dipati sedih.
51
