Ieu kaca geus divalidasi
V. USUL KUMPENI DITOLAK.
Pucung
- Henteu lila utusan kumpeni cunduk, ka tempat geus datang, bareng jeung anu diboyong, sarerea jrat-jrut turun tina kuda.
- Disampeurkeun ku prajurit nu tarunggu, gancangna ditanya, pamingpinna pok nyarios, yen maksadna rek nepangan ka Panglima.
- Dideuheuskeun ka Kangjeng Dipati Ukur, anu keur riungan, jeung kekentong Sunda kabeh, kumpeni teh ku Panglima ditampina.
- Utusan teh reana ngan ukur tujuh, ari kapalana, soldadu pangkatna Kapten, jigana teh dipilih nu ngarti basa.
- Dina srogna ngenalkeun leuwih ti payun, bari tatabean, nembongkeun nu hade hate, teu adigung ka Dalem Ukur ngahormat.
- Sabadana ditaros ku Dalem Ukur, naon pamaksudan, Kapten gancangna ngawalon, ngomongna teh basana Malayu kasar.
- Sundana mah Pangeran Dipati Ukur, anu mawi dongkap, ngahajakeun ka dieu teh, nuju ngemban utusan ti Tuan Besar.
- Tuan Besar kumpeni Jan Piterszoon Coen mantenna amanat, ka jisim kuring nyarios, saurna teh salam baktos ka Pangeran.
- Hatur nuhun pisaur Dipati Ukur, atuh sawangsulna, salam ti kaula oge, pangdugikeun ku Kapten ka Tuan Besar.
- Kaduana jisim kuring teh panuhun, prajurit boyongan, ku emutan langkung sae, mugi rempag sayagi liron boyongan.
- Pamundut teh kantenan bae satuju, asal nu saimbang, jumlahna ulah rek geseh, kitu deui sami kalungguhanana.
- Nyaur kitu Pangeran Dipati Ukur, ras emuteun pisan, ka Ngabehi nu kaboyong, Judakerta anu bela ka anjeunna.53
