Ieu kaca geus divalidasi
VI. DIPATI UKUR KATAWAN
Midjil
- Dalem Ukur sareng Senapati, kocap geus marios, tunggang kuda jalanna mopoek, harita teh wanci tengah peuting, najan bulan bijil ku mega katutup.
- Henteu nyorang jalan urut tadi, ka tengah tur motong, mapay lembur nu kosong rarehe, jelemana kakota ngarungsi, Pangeran Dipati, angkatna teh ngapruk.
- Sakalian najan rada tebih, bari lunta lanto, mapay jalan nu dipandang hade, keur isukan dina maju jurit, ulah hese deui, pijalaneun timu,
- Takdir diri teu kenging dipungkir, kerasaning Yang Manon, kedah pendak jeung nasib nu goreng, barang deukeut ka tempat Kumpeni, nu angkat balai, kudana tikusruk.
- Hihieman teu bisaeun indit, nincak embel jero, suku hareup tibelesek kabeh, Dalem Ukur geubis ngajuralit, teu iasa usik, dina embel mubuy.
- Suranangga teu talangke deui, maksudna ngarontok, rek nulungan nu keur kusah koseh, ngan barang jut luncat tarik teuing, Suranangga sami, kana embel mubus.
- Boro-boro nulungan Dipati, anu bobolokot, sorangan ge jigana geus hese, Dalem Ukur najan hese usik, rencangna ge sami, salira teu tatu.
- Puguh deukeut ka tempat Kumpeni, gancang kaperego, jeung kudana hihieman bae, mani rabul Walanda nalungtik, barang srog kapanggih, geus netepkeun musuh.
- Kumpeni teh nu saurang gasik, ngudag bari moro, Suranangga ku tambang dirawe, geus kajiret gasik pada narik, barang geus katarik, tuluy ditalikung.
- Teras deui Kangjeng Adipati, dieurad dibedol, dihanjatkeun ka darat disered, tur panangan dibeungkeut ku tali, teu beda jeung paling, katewak dibekuk.
58
