Ieu kaca geus divalidasi
- Ku jalaran anjeunna ningali, anu diborogod, Suranangga beberengos bae, Kangjeng Ukur maparin wawadi, ulah leutik ati, tong dipake bingung.
- Sarta urang tong ngarasa risi, rek inggis mah komo, kudu ayem sarta tengtrem bae, leuwih hade sumerah ka Gusti, da puguh kiwari, dina leungeun musuh.
- Kabeneran komandan nu jagi, jeung Dipati wanoh, henteu samar sidik geuning Kapten, nu ti beurang diutus badami, jeung Kangjeng Dipati, nu ngasongkeun usul.
- Eta Kapten nyeh katingal seuri, pok manehna ngomong, Aeh-aeh Pangeran ieu teh, jisim kuring henteu lepat deui, naha sumping wengi, aya naon kitu.
- Saur Dalem leres jisim kuring, ngawaler nu naros, teger panger manahna teu keder, teu galideur tebih ti karisi, dina manah muji, pasrah ka Nu Agung.
- Tuluy Kapten miwarang nu jagi, ngabersihan kantor, nu ayana di jeroeun benteng, tawanan teh ka dinya digiring, barang geus tarapti, gancangna arasup.
- Kapten tea jelema berbudi, mun ngomong teu songong, sopan santun parangina hade, sinatria hatena beresih, turta welas asih, sanajan ka musuh.
- Dalem Ukur sareng Senapati, anu diborogod di kantor mah dilaanan bae, sina siram sareng beberesih, lajeng disaralin, ku anggoan alus.
- Ti dinya mah prak disina calik, Kapten pok tumaros, basana teh hade sarta sareh, anumawi Kangjeng Ukur sumping, tangtos rek badami, keur siang can putus.
- Dalem Ukur teu ngawaler gasik, teu enggal nyarios, sajongjongan ngan ngaheneng bae, ngamanahan sangkan teu kata wis, keur nilik nalungtik, Kapten pok misaur.
- Saupami leres bade dami, sadayana raos, kapalayna Tuan Besar Sepek, nu ayeuna nuju jadi wakil, urang kedah sumping, nepangan ka ditu.
- Ngadangueun omong Kapten tadi, manahna molongpong, kagalihna jalan anu sae, bisa jadi pituduh ti Gusti, ti Nu Maha Suci, pok anjeunna nyaur.
59
