Ieu kaca geus divalidasi
- nu mariksa teh, ngaluarkeun patarosan, anu kitu sipatna, mo lepat rek ngadu-ngadu, mesem leleb pok ngandika.
- Tuan Besar sing tingali, kaula henteu rumasa, mun Mataram ngajajah teh, kadar ngayakeun mimitran, baris silih belaan, mun aya bancang pakewuh, nu tumiba ka Nagara.
- Sumangga ku anjeun galih, kinten-kintenna merenah, badanten mung kula bae, meureun disebut hianat, ka bangsana sorangan, emutan mun seug barempug, Mataram kedah diajak.
- Leres Pangeran Dipati, memang kitu sakedahna,sanggem Tuan Besar Sepek, bari jeung angguk-anggukan, nurutkeun pamendak mah, Mataram moal rek Purun, bade ngangken sadarajat.
- Buktina raja laleutik, nu aya di palih wetan, sareng nu ti palih kaler, sapertos Demak Japara, Tuban jeung Geresikna. Jaratan ge sami kitu, ditalukkeun diperangan.
- Malah sanes wartos deui, upami teu kahalangan, ku Kumpeni beulah kulon, Karajaan Banten resak, lebet kana rancana, tetela bade dirurug, tah sakitu nya katerang.
- Leres anu dipilahir, nanging pikeun kaula mah, tetap dina ieu waktos, netepan laku Satria, nedunan perjangjian, pasang subaya nu pengkuh, antara Sunda-Mataram.
- Yuan Sepek lir nu isin, geus Kapeped cariosan, ngomongna geus rada sombong, beungeutna beureum burahay, upama pamadegan, ti anjeun rek tetep kitu, ka dieu teh tanpa guna.
- Dipati Ukur milahir, ayem tengtrem henteu robah. nembongkeun pasemon hade, sanajan teu ngawartosan, ka Pamanggul Mataram, nanging kaula teh sanggup, bade babalagonjangan.
- Jeung Kumpeni bade nyobi, ngayakeun babadantenan, Sangkan perang gancang repeh, tangtos ku pihak Mataram, tiasa karempagan, ditanggel yakin saluyu, margi sami pamadegan.
- Mereskeun ieu perkawis, kaula teu kaabotan, jadi penghubung nu hade, ti Kumpeni jeung Mataram, sinareng sawangsulna, asal Kumpeni rek tuhu, nedunan kahayang kula.
- Jendral Sepek pok wawarti, jiga nu keuheuleun pisan, naon pamundut anjeun teh, kula oge hayang terang, sumangga geura pedar, Dipati Ukur pok nyaur, terus terang ka Walanda.
61
