Ieu kaca geus divalidasi
- rep rek ngagempur musuh, ngabela bangsa sorangan, nu ku deungeun rek dilindih.
- Naha teu aya emutan, yen Mataram mun unggul dina jurit, hak anjeun baris direbut, atawa digadabah, Tuan Sepek ngomongna jeung umat-imut, jiga anu ngalelewang, sangkan timbul rasa benci.
- Dipati Ukur teu robah, tetep tagen lajeng ngawaler deui, anjeun henteu kedah ngemut, eta urusan kula, Kumpeni mah henteu kedah ulubiung, montong ngiring ngingkilikan, eta urusan pribadi.
- Upami leres buktina, Mataram teh boga karep ngalindih, kula pribadi nu maju, kudu ngayonanana, ngabelaan milik turunan karuhun, keur ngajaga kahormatan, kaula moal rek risi.
- Mugi sing paos ngamanah, ulah lali Mataram ahli jurit, balad jeung gagaman cukup, tebih henteu saimbang, teu kahartos anjeun sanggem rek ngagempur, Tuan Sepek kitu pokna, nyacampah Kangjeng Dipati.
- Najan kitu sasauran, ku kaula moal panjang dipikir, tina hal ngagempur musuh, anjeun mugi uninga, moal ngengken Wangsataruna ge sanggup, haram rek minangsaraya, sok komo mun ka Kumpeni.
- Menggah soal kasanggupan, teu gumantung prajurit laksa keti, reana balad jeung pamuk, ranggetengna gegaman, keur kaula cukup sumangetna teguh, keur ngabela kahormatan, korban raga reujeung pati.
- Ih ari sayaktosna mah, Tuan Sepek ngomong jeung seuri leutik, Kumpeni hayang midulur, sareng ngajak mimitran, maksadna mah taya sanes hoyong nulung, rek ngajaga kalungguhan, bilih aya nu ngalindih.
- Supados aman santosa, Pangeran teh taya nu nyisikudi, taya nu ngaharu biru, malahan saterasna, bilih bae palay nyeueuran ngawengku, nambihan kakawasaan, Kumpeni singkil sayagi.
- Dalem Ukur ngawaleran, pamadegan ajeg teu lanca linci, anjeunna katingal bendu, pedah teras-terasan, geus dipukpruk diolo sangkan samiuk, tapi da geus kasakuan, maksud ngadukeun pribumi.
66
