Ieu kaca geus divalidasi
- Bari nyaur serepet mesat wangkingan, keris pusaka sakti, nelah Culanaga, mani ngempur pamorna, ti Gunung Lumbung pangwaris, Eyang Buyutna, Sunan Dampal Suwargi,
- Kapten bengong nenjo pamorna pusaka, laleuleus tulang sandi, rampohpoy teu nangan, teu aya pangawasa, ku perbawa eta keris, si Culanaga, hurung lir seuneu badis.
- Manehna teh maksakeun undur-unduran teu lesot neuteup keris, anu masih ngabar, najan ngarasa serab, asa gejos bae niir, kana dadana, bakating gigis miris.
- Jendral Sepek nenjo Kapten kitu peta, olohok henteu ngarti, tuluy bae cengkat, jung nangtung lalaunan sigana rek nyokot bedil, deukeut manehna, Suranangga caringcing.
- Kerewek teh dicekel lebah dadana, didedetkeun sakali, teu majar kumaha, da leungeun ngan sabeulah, sabeulah deui teu usik, potong karasa, gek bae diuk deui.
Kinanti
- Pangaruh Dipati Ukur, jero kamar jadi jempling, wibawa jeung komarana, anu panas jadi tiis, Jendral Sepek teras lenggah, ngahuleng jiga nu mikir.
- Kapten kawas nu ngalindur, ngised ngadeukeutan korsi, ninggangkeun maneh diukna, beungeut pias kawas mayit, panon neuteup Culanaga, ngabar keneh matak gigis.
- Walanda galede jangkung, geumpeur hatena jejerih, perbawana Culanaga, robah panenjo nu miris, geus kalabur pangacian, tambah kakeueung karisi.
- Anu katenjo teh wujud, sidik mahluk nu ngajirim, tetela bet oray naga, gedena leuwih ti misti, sungutna Cacalawakan, sihungna paranjang lancip.
- Letah beureum siga hurung, ambekan kadenge tarik, disada mani hoshosan, tina sungut seuneu bijil, tambah rehe jero kamar, teu beda jeung tengah peuting
- Jendral Sepek langkung bingung, luak-lieuk mangsarmingsir, nepi ka hese ngambekan, bakating ku henteu ngarti, antukna haharegungan, mapaler sieun jeung nyeri.
- Pangeran Dipati Ukur, ngalebetkeun deui keris, geus
70
