Ieu kaca geus divalidasi
Pucung
- Henteu lila kareta milor geus cunduk, ka benteng geus datang, benteng pertahanan Kapten tur datangna salamet, taya gangguan.
- Dalem Ukur geus dihaturanan lungsur, dicalikkeun heula, diangken di kantor Kapten, bari ngantos kuda keur titihanana.
- Sabot ngantos kudana anu dikantun, rengse didangdanan, raos ngaleueut jeung Kapten, selang-selang ku obrolan mani gepyak.
- Sanggeus kuda ngajagrag aya di payun, anjeunna pamitan, lajeng permios ka Kapten, nganuhunkeun kana kasaeanana.
- Sawangsulna Kapten oge ngucap sukur, kana kasaean Dipati Ukur nu soleh, sasalaman ngawilujengkeun nu jengkar.
- Bet ngalengis Kapten ka Dipati Ukur, pokna ku hanjakal, naha make kudu getreng, jeung pareheng urang terus mumusuhan.
- Eta kecap diwaler ku Dalem Ukur, nu kieu saurna, memang leres ngan urang teh, da geus kieu teu bisa majar kumaha.
- Sami-sami ngajalankeun gawe luhur, hiji kawajiban, anjeun ge sarua bae, jeung kaula keur ngabela hak sorangan.
- Suranangga sinareng Dipati Ukur, jengkar nitih kuda, muru pasanggrahan bae, nu pernahna ti Cihaliwung teu anggang.
- Sajajalan pasukan anu narunggu, anu geus disebar, di tempat nu geus kaereh, ku anjeunna imeut kabeh.
- Dipariksa bok aya bancang pakewuh, halangan harungan, ti musuh nu arek goreng, nu ngadukeun antara urang jeung urang.
- Rentang-rentang Dipati Ukur rek cunduk, ger bae sarurak, bawaning ngarasa atoh, ku lantaran asalna nyangka katawan.
- Para Cutak-Ngabehi mapag ka payun, cung-cong marunjungan, kabeh pada mikasono, tur parangi wedih asih ka dunungan.
- Sadayana di pasanggrahan ngariung, keur 73
