Ieu kaca geus divalidasi
- Ki Semah teh lakuna sakarep ingsun, lamun menta kudu bukti, sok rajeun aya nu nanduk, ngan temahna matak sedih, disiksa terus diberok.
- Ditandasa teu beda jeung ka nu burung, dinyenyeri dipeupeurih, dituduh pangasut lembur, nu ngahiji jeung Kumpeni, putusan ti Ronggonoto.
- Rahayat teh seueur pisan nu arusul, marek ka Juragan Patih, ka wakil Papayung Agung, tapi henteu mawa hasil, da anjeunna oge dongkol.
- Anjeunna teh manahna ewed kalangkung, estuning teu aya aji, katambih parantos sepuh, teu aya geusan badami, arek nyanggah teu kaerong.
- Kapalana nu kawasa ngurus ngatur, anu ngakukeun pamingpin, cadang teda keur ka payun, nu katelah Senapati, Adipati Ronggonoto.
- Nu baheula ceuceub ka Dipati Ukur, nu maraos moal lali, nalika Dipati Ukur, di Mataram nuju ngabdi, jaman anjeunna keur anom
- Iau pisan nu nyontoan henteu puguh, sagala kumaha aing, boga rasa paling luhur, kawasa jadi pamingpin, ka batur ngan haok hamprong.
- Talajakna teu paya nenjo nu alus, dipentaan teu dibeuli, ka ditu ka dieu ngutus, neangan mojang nu geulis, piselireun nu daronto.
- Teu diturut Ronggonoto pasti bendu, wani nyiksa nganyenyeri, gawena ngalajur napsu, cunihin seneng ka istri, teu kaop nenjo nu denok.
- Hiji mangsa dideuheusan ku sesepuh, nyaeta Juragan Patih, dipunjung sarta dijungjung lantip nyelapkeun wawadi, tapi kalah ka ngadolos.
- Ronggonoto pantesna mah kudu sukur, sabalikna bet jejebris, gantawang manehna bendu, nyarekan beak beresih, teu nganggap pisan ka kolot.
- Basana teh bari nangtung jeung tutunjuk, bisi sampean teu ngarti, kami teh ku Sultan Agung, geus diangkat Senapati, di
76
