Ieu kaca geus divalidasi
- Pok ngalahir bari bendu, sowantenna ngoncrang tarik, tembong dangong komaraan, sanajan geus aki-aki, teu ngompod popoyongkodan, neuteup ludeung ka Dipati.
Asmarandana
- Aeh-aeh Adipati, kutan teu boga cahara, teu permisi bet norojol, teu aya bema karama, laku sawenang-wenang, nyaur teu diukur-ukur, nyabda teu diungang-ungang.
- Kaula teh Pangkat Patih, lain pakacar sampean, dunungan keur ngadu rempon, teu cara anjeun loyogna, ukur daek raranjah, batur mah keur perang campuh, ari anjeun kitu peta.
- Nguping kasauran Patih, anu sakitu peureusna, Adipati Ronggonoto, sewot lain dikieuna, gancang nitah rencangna, hohoak bari tutunjuk, popolotot bari nyentak.
- Eh mantri tah aki-aki, gancangan bawa ka luar, ulah diantep ngabacot, pek paksa tungtun kumisna, lamun wani ngalawan, pek tampiling terus gusur, sabab tuman bisi nular.
- Kerewek Juragan Patih, ditarewak ku duaan ka luar teras disered, bari pada nareplekan, henteu aya rasrasan, padahal eta teh sepuh, enggeus euweuh kakuatan.
- Kangjeng Istri ret ningali, Juragan Patih dihina, teras lungsur tina amben, ngadeg caket pangcalikan, teuneung ludeung tur tandang, manah bendu ngagugudug, raos ditincak mastaka.
- Pok ngalahir tarik bengis, kawas pameget hohoak, salira mani ngadegdeg, saurna aeh Ki semah asa kabina-bina, ngadolos sakarep ingsun, campelak teh pameakan.
- Itu teh Juragan Patih, wakil caroge kaula, lain semah nu keur ngendon, lain wilayat sampean, ulah kena kawasa, ieu aing jadi pamuk, tindakan sawenang-wenang.
- Ronggonoto pok ngalahir, ngawalonan lalaunan, bari seuri hahah-heheh, lir nu nyimbutan kaera, euleuh geuning panutan, nu geulis iasa bendu, bedangna ge matak nyaah.
- Matak kairut katarik, kagoda matak kagendam, dasar mustika Karaton, kawentar mojang Priangan, keur geulis bisa dangdan, najan bendu tetep lucu, matak kairut nu ningal.
- Aya lalaki cunihin, nurus tunjung matak cua, ngomong
80
